Y-Êsêkiêl 10 - Klei Aê Diê Blŭ 2015

Klei Guh Kơang Yêhôwa Đuĕ Mơ̆ng Sang Yang

¹ Kâo dlăng leh anăn nĕ anei, ti čhiăm guôm ti dlông boh kŏ phung čêrubim mâo mnơ̆ng bi êdah ti dlông diñu msĕ si boh tâo yuôm saphir, dlăng msĕ si sa boh jhưng mtao.

² Yêhôwa lač kơ êkei hơô ao kbuă, “Mŭt bĕ hlăm pông dôk dar ti gŭ phung čêrubim, bi bŏ kngan ih hŏng hdăng ngur mơ̆ng plah wah phung čêrubim, leh anăn sai dŏ anăn ti dlông ƀuôn Yêrusalem.” Êjai kâo dôk dlăng kâo ƀuh gơ̆ mŭt.

³ Phung čêrubim dôk dơ̆ng tĭng djiêô dhŭng sang tơdah êkei anăn mŭt; leh anăn knam bi bŏ wăl ti lam.

⁴ Hlăk anăn klei guh kơang Yêhôwa đĭ mơ̆ng phung čêrubim truh kơ kmhia sang; leh anăn sang bŏ hŏng knam, leh anăn wăl bŏ hŏng klei mngač mơ̆ng klei guh kơang Yêhôwa.

⁵ Ênai siap phung čêrubim arăng hmư̆ tơl truh ti wăl ti êngao, msĕ si asăp Aê Diê Pô Mâo Jih Klei Myang tơdah Ñu blŭ.

⁶ Tơdah Ñu mtă kơ êkei hơô ao kbuă, “Mă bĕ pui mơ̆ng plah wah pông dôk dar, mơ̆ng plah wah phung čêrubim,” gơ̆ mŭt leh anăn dôk dơ̆ng ti djiêô sa boh pông.

⁷ Sa čô čêrubim yơr kngan ñu mơ̆ng plah wah phung čêrubim leh anăn mă đa đa pui anăn, leh anăn dưm pui anăn hlăm kngan êkei hơô ao kbuă; gơ̆ mă leh anăn kbiă nao.

⁸ Ti gŭ siap phung čêrubim mâo rup sa ƀĕ kngan mnuih.

⁹ Kâo dlăng leh anăn nĕ anei, mâo pă boh pông ti djiêô phung čêrubim, sa boh pông ti djiêô grăp čô čêrubim, leh anăn pông anăn bi êdah msĕ si boh tâo mngač krisôlit.

¹⁰ Bi kơ rup čêrubim, jih pă čô jing msĕ, msĕ si sa boh pông dôk hlăm sa boh pông mkăn.

¹¹ Tơdah diñu nao, diñu nao phă pă ƀĭt kiêng amâo wir kơ điâo hnuă ôh êjai diñu nao. Tui si pông ti anăp nao, pông mkăn tui hlue, amâo wir điâo hnuă ôh êjai diñu nao.

¹² Kluôm asei mlei wăt rŏng diñu, kngan leh anăn siap diñu, leh anăn jih jang pông pioh kơ pă čô čêrubim anăn bŏ hŏng ală jŭm dar.

¹³ Bi kơ pông, arăng pia tui si kâo hmư̆ jing “pông dôk dar.”

¹⁴ Grăp čô čêrubim mâo pă ƀô̆ mta: ƀô̆ tal sa jing ƀô̆ čêrubim, ƀô̆ tal dua jing ƀô̆ mnuih, ƀô̆ tal tlâo jing ƀô̆ êmông gu, leh anăn ƀô̆ tal pă jing ƀô̆ tlang.

¹⁵ Phung čêrubim đĭ kơ dlông. Anei jing phung mnơ̆ng hdĭp kâo ƀuh leh ti êa krông Kêbar.

¹⁶ Tơdah phung čêrubim nao, pông nao ti djiêô diñu; leh anăn tơdah phung čêrubim mblang siap diñu čiăng đĭ phă dlông mơ̆ng lăn, pông amâo wir điâo hnuă diñu ôh.

¹⁷ Tơdah phung čêrubim dôk, pông dôk msĕ mơh, leh anăn tơdah phung čêrubim đĭ, pông đĭ mbĭt hŏng diñu mơh; kyuadah mngăt myang mnơ̆ng hdĭp dôk hlăm pông.

¹⁸ Leh anăn klei guh kơang Yêhôwa kbiă mơ̆ng kmhia sang yang leh anăn nao dôk ti dlông čêrubim.

¹⁹ Phung čêrubim mblang siap diñu leh anăn đĭ phă dlông mơ̆ng lăn ti anăp ală kâo, êjai diñu nao pông ti djiêô diñu nao mbĭt, leh anăn diñu dôk ti anôk mŭt ƀăng jang ngŏ sang Yêhôwa; leh anăn klei guh kơang Aê Diê Israel dôk ti dlông diñu.

²⁰ Anei jing mnơ̆ng hdĭp kâo ƀuh leh ti gŭ Aê Diê Israel ti êa krông Kêbar; leh anăn kâo thâo diñu jing phung čêrubim.

²¹ Grăp čô mâo pă ƀô̆ mta, grăp čô mâo pă pŏk siap, leh anăn ti gŭ siap diñu mâo msĕ si kngan mnuih.

²² Bi kơ ƀô̆ mta diñu, diñu jing msĕ si ƀô̆ mta bi êdah leh kâo ƀuh ti êa krông Kêbar. Grăp čô diñu nao phă anăp.