Y-Êsai 46 - Klei Aê Diê Blŭ 2015

¹ Yang Bel buôn, yang Nêbô êbuh; rup yang diñu dôk ti rŏng hlô mnơ̆ng leh anăn êmô. Mnơ̆ng anei diih mdiăng jing sa mnơ̆ng ktrŏ bi êmăn hlô mnơ̆ng.

² Phung yang anăn buôn leh anăn êbuh mđrăm mbĭt; diñu amâo dưi bi mtlaih mnơ̆ng ktrŏ ôh, ƀiădah diñu pô đuĕ nao jing mnă.

³ “Dôk hmư̆ bĕ Kâo, Ơ sang Yakôp, jih jang phung adôk mơ̆ng sang Israel, phung Kâo răng kriê leh mơ̆ng êjai dôk hlăm tian amĭ diih, phung Kâo pŭ ƀă mơ̆ng hruê amĭ diih kkiêng.

⁴ Tơl diih jing mduôn Kâo ăt jing msĕ, tơl diih čăt ƀŭk kô̆ Kâo srăng pŭ diih. Kâo mjing leh, leh anăn Kâo srăng răng kriê; Kâo srăng pŭ leh anăn srăng bi mtlaih diih.

⁵ Hŏng hlei pô diih srăng bi msĕ leh anăn bi mđơr hŏng Kâo? Hŏng hlei pô diih srăng bi msĕ Kâo čiăng kơ hmei dưi jing mđơr?

⁶ Phung bi liê lu mah mơ̆ng kdŭng, leh anăn mkă prăk hŏng knăng, mưn sa čô mnuih tia mah brei ñu ngă rup yang. Leh anăn diñu buôn leh anăn kkuh mpŭ!

⁷ Diñu pŭ klam gơ̆ ti mra, diñu mdơ̆ng ti anôk gơ̆, leh anăn gơ̆ dôk dơ̆ng tinăn; gơ̆ amâo kpư̆ đuĕ mơ̆ng anôk gơ̆ ôh. Wăt tơdah arăng ur akâo kơ gơ̆, gơ̆ amâo dưi lŏ wĭt lač ôh, kăn bi mtlaih diñu mơ̆ng klei rŭng răng rei.

⁸ Brei diih hdơr klei anei leh anăn ksiêm mĭn, Ơ phung gao klei bhiăn, brei diih lŏ hdơr kơ klei anăn.

⁹ Brei diih hdơr kơ klei ênuk đưm, kyuadah Kâo jing Aê Diê, amâo mâo pô mkăn ôh. Kâo jing Aê Diê, amâo mâo pô msĕ si Kâo ôh.

¹⁰ Kâo hưn klei srăng truh mơ̆ng mphŭn truh kơ knhal tuč, leh anăn hưn mơ̆ng ênuk đưm klei ka truh ôh, lač, ‘Klei Kâo kčĕ srăng ăt dôk, leh anăn Kâo srăng bi leh jih klei Kâo čuăn.’

¹¹ Kâo srăng iêô mơ̆ng ngŏ sa drei čĭm tlang, sa čô mnuih mơ̆ng čar kbưi bi truh klei Kâo čiăng. Klei Kâo blŭ leh Kâo srăng bi truh klei anăn; klei Kâo čuăn leh, Kâo srăng ngă klei anăn.

¹² Dôk hmư̆ Kâo bĕ, Ơ phung mâo ai tiê khăng, phung dôk kbưi mơ̆ng klei kpă ênô.

¹³ Kâo ba klei kpă ênô Kâo giăm, ñu amâo dôk kbưi ôh, leh anăn klei Kâo bi mtlaih amâo srăng dôk guôn sui ôh. Kâo srăng brei klei bi mtlaih hlăm ƀuôn Siôn, pioh klei guh kơang Kâo kơ phung Israel.”