Y-Êsai 2 - Klei Aê Diê Blŭ 2015

Klei Yêhôwa Kiă Kriê Tar Anôk Hŏng Klei Êđăp Ênang

¹ Klei Y-Êsai anak êkei Y-Amôt ƀuh djŏ kơ čar Yuđa leh anăn ƀuôn Yêrusalem.

² Hlăm ênuk knhal tuč čư̆ sang yang Yêhôwa arăng srăng mđĭ brei jing čŏng čư̆ dlông hĭn, leh anăn bi mđĭ ñu ti dlông jih jang kbuôn; leh anăn jih jang găp djuê mnuih srăng kluh nao kơ ñu.

³ Lu phung ƀuôn sang srăng hriê leh anăn lač, “Bơ bĕ, brei drei đĭ nao kơ čư̆ Yêhôwa, kơ sang Aê Diê phung Yakôp, čiăng kơ Ñu bi hriăm êlan Ñu kơ drei, leh anăn čiăng kơ drei dưi êbat hlăm êlan Ñu.” Kyuadah klei bhiăn srăng kbiă mơ̆ng ƀuôn Siôn, leh anăn klei Yêhôwa blŭ srăng kbiă mơ̆ng ƀuôn Yêrusalem.

⁴ Ñu srăng phat kđi phung găp djuê mnuih, leh anăn Ñu srăng blŭ kđi kơ lu phung ƀuôn sang. Digơ̆ srăng tia đao gưm digơ̆ mjing kơ wăng kai, leh anăn kju digơ̆ mjing kơ mniă. Sa găp djuê mnuih amâo srăng lŏ suê̆ đao gưm ngă kơ găp djuê mkăn ôh, kăn digơ̆ srăng lŏ hriăm bi blah rei.

Klei Yêhôwa Phat Kđi kơ Phung Mgao

⁵ Ơ sang phung Yakôp, hriê bĕ, brei drei êbat hlăm klei mngač Yêhôwa.

⁶ Kyuadah Ih hngah leh êlan phung ƀuôn sang Ih, sang phung Yakôp. Kyuadah diñu bŏ hŏng phung mdian mơ̆ng čar Ngŏ, leh anăn ngă msĕ si phung mjâo phung Philistin, leh anăn diñu djă kngan hŏng phung tue amâo đăo ôh.

⁷ Čar diñu bŏ hŏng prăk leh anăn mah, amâo mâo knhal ôh kơ klei mdrŏng diñu. Čar diñu bŏ hŏng aseh, leh anăn êdeh aseh.

⁸ Čar diñu bŏ hŏng rup yang, diñu buôn kkuh kơ bruă kngan diñu pô ngă, mnơ̆ng kđiêng diñu pô mkra.

⁹ Phung điêt arăng srăng bi luč phung prŏng arăng srăng mdlưh. Đăm pap brei kơ diñu ôh.

¹⁰ Mŭt bĕ hlăm boh tâo, leh anăn đuĕ dăp bĕ hlăm ƀruih lăn mơ̆ng klei Yêhôwa bi huĭ, leh anăn mơ̆ng klei ktlă klei guh kơang Ñu.

¹¹ Ală mnuih krưh arăng srăng mdlưh leh anăn arăng srăng bi luă gŭ phung mgao. Knŏng hjăn Yêhôwa srăng mâo klei bi mđĭ hlăm hruê anăn.

¹² Kyuadah Yêhôwa kơ phung kahan bi kčah leh sa hruê Ñu srăng ngă kơ jih phung mgao, kơ phung krưh, leh anăn diñu bi luă gŭ diñu pô;

¹³ ngă kơ jih jang kyâo sêdar mgao čar Liƀan, leh anăn kơ jih jang kyâo têrêbin ti čar Basan;

¹⁴ kơ jih jang čư̆ leh anăn kbuôn dlông;

¹⁵ kơ jih jang sang tum dlông, kơ jih jang mnư̆ mgang,

¹⁶ kơ jih jang kŭmpăn Tarsis, leh anăn kơ jih jang mnơ̆ng bi mơak kơ ală.

¹⁷ Arăng srăng bi luă gŭ phung krưh, leh anăn srăng mtrŭn phung mgao. Knŏng hjăn Yêhôwa srăng mâo klei bi mđĭ hlăm hruê anăn.

¹⁸ Rup yang srăng êgao tuč.

¹⁹ Phung mnuih srăng mŭt hlăm ƀăng čư̆ boh tâo leh anăn hlăm ƀăng ƀruih lăn čiăng tlaih mơ̆ng klei Yêhôwa bi huĭ leh anăn klei ktlă klei guh kơang Ñu, tơdah Ñu kgŭ čiăng êyuh lăn ala.

²⁰ Hlăm hruê anăn phung mnuih srăng hwiê hĕ kơ kkuih leh anăn kơ knhuăr rup yang prăk leh anăn rup yang mah diñu, diñu ngă leh pioh kkuh mpŭ.

²¹ Diñu srăng mŭt hlăm ƀăng kđang boh tâo leh anăn hlăm anôk ƀlŭng hlăm boh tâo mơ̆ng klei Yêhôwa bi huĭ leh anăn mơ̆ng klei ktlă klei guh kơang Ñu, tơdah Ñu kgŭ čiăng êyuh lăn ala.

²² Đăm lŏ knang kơ mnuih pô knŏng thâo bi êwa ti ƀăng adŭng, kyuadah ya klei yuôm ñu jing?