Y-Amôs 3 - Klei Aê Diê Blŭ 2015

Bruă Khua Pô Hưn Êlâo

¹ Ơ phung anak čô Israel, hmư̆ bĕ klei Yêhôwa blŭ bi kdơ̆ng hŏng diih, bi kdơ̆ng hŏng jih jang găp djuê Kâo bi kbiă leh mơ̆ng čar Êjip:

² “Knŏng hjăn diih yơh Kâo thâo kral leh hlăm jih jang phung găp djuê mnuih ti lăn ala; kyuanăn Kâo srăng bi kmhal diih kyua jih jang klei wê diih.”

³ Dưi mơ̆ dua čô êbat mbĭt tơdah diñu ka bi ư ai ôh?

⁴ Djŏ mơ̆ sa drei êmông gu gruh hlăm kmrơ̆ng tơdah ñu amâo mâo hlô ñu mă? Djŏ mơ̆ êđai êmông gu ur hlăm ƀăng ñu tơdah ñu amâo mâo mnơ̆ng ñu mă?

⁵ Mâo mơ̆ sa drei čĭm djŏ ƀưi tơdah arăng amâo ƀêč ôh ƀưi ti lăn? Klei mnêč ƀưi dlưh mơ̆ mơ̆ng lăn tơdah ñu amâo mâo mă sa mta mnơ̆ng ôh?

⁶ Tơdah arăng ayŭ ki hlăm sa boh ƀuôn prŏng, phung ƀuôn sang amâo huĭ ôh? Mâo mơh klei jhat truh kơ sa boh ƀuôn prŏng tơdah Yêhôwa amâo ngă klei anăn?

⁷ Sĭt nik Aê Diê Yêhôwa amâo ngă sa mta klei ôh tơdah Ñu amâo hưn klei hgăm Ñu kơ phung dĭng buăl Ñu, phung khua pô hưn êlâo.

⁸ Êmông gu gruh leh; hlei pô amâo srăng huĭ? Aê Diê Yêhôwa blŭ leh; hlei pô amâo srăng hưn êlâo?

Klei Bi Rai Phung Samari

⁹ Hưn bĕ kơ kđông kjăp hlăm čar Asdôt, leh anăn kơ kđông kjăp hlăm čar Êjip, “Bi kƀĭn bĕ diih ti dlông čư̆ Samari, leh anăn dlăng bĕ klei hao hao rŭng răng lu snăk hlăm ñu, leh anăn klei ktư̆ juă ti krah ñu.”

¹⁰ Yêhôwa lač, “Phung mkăm klei măk ƀai leh anăn ngă klei knĕ hlăm kđông kjăp amâo thâo ngă klei djŏ ôh.”

¹¹ Kyuanăn snei Aê Diê Yêhôwa lač: “Sa phung roh srăng wang čar, leh anăn srăng mdlưh hĕ klei ktang ih, leh anăn srăng plah mă kđông kjăp ih.”

¹² Snei Yêhôwa lač: “Msĕ si mgăt biăp ktŭng mơ̆ng ƀăng êgei êmông gu dua ƀĕ jơ̆ng, amâodah sa kdrêč knga, snăn mơh arăng srăng dŏng phung ƀuôn sang Israel phung dôk hlăm čar Samari, ti kiêng sa boh jhưng amâodah ti dlông jhưng pĭt.”

¹³ “Hmư̆ bĕ leh anăn hưn bi kdơ̆ng hŏng sang Yakôp,” Yêhôwa Aê Diê kơ phung kahan lač.

¹⁴ “Hlăm hruê Kâo bi kmhal Israel kyua ñu gao klei bhiăn, Kâo srăng bi rai phung knưl ƀuôn Ƀêthel; arăng srăng khăt hĕ ki knưl leh anăn srăng dlăm ti lăn.

¹⁵ Kâo srăng bi rai sang yan puih wăt sang yan bhang; lu sang ngă hŏng mla leh anăn lu sang prŏng srăng rai msĕ mơh,” Yêhôwa lač.