Y-Amôs 2 - Klei Aê Diê Blŭ 2015

¹ Snei Yêhôwa lač: “Kyua tlâo mta klei Môap gao klei bhiăn, wăt pă mta mơh, Kâo amâo srăng bi mlih ôh klei Kâo bi kmhal ñu; kyuadah diñu čuh leh klang mtao čar Êđôm tơl jing hbâo.

² Snăn Kâo srăng mơĭt pui ti dlông čar Môap, leh anăn pui anăn srăng ƀơ̆ng kđông kjăp ƀuôn Kêriôt, leh anăn Môap srăng djiê ti krah klei hao hao, ti krah klei ur driâo leh anăn asăp ki.

³ Kâo srăng bi rai mtao mơ̆ng ti krah ñu, leh anăn srăng bi mdjiê jih jang phung khua ñu mbĭt hŏng ñu,” Yêhôwa lač.

⁴ Snei Yêhôwa lač: “Kyua tlâo mta klei Yuđa gao klei bhiăn nanao, wăt pă mta mơh, Kâo amâo srăng bi mlih ôh klei Kâo bi kmhal ñu; kyuadah diñu hngah leh kơ klei bhiăn Yêhôwa, leh anăn amâo djă pioh ôh klei Gơ̆ mtă, ƀiădah klei diñu luar bi wơr êlan diñu leh, tui êlan phung aê diñu êbat leh.

⁵ Snăn Kâo srăng mơĭt pui ti dlông čar Yuđa, leh anăn pui anăn srăng ƀơ̆ng kđông kjăp ƀuôn Yêrusalem.”

Klei Phat Kđi Phung Israel

⁶ Snei Yêhôwa lač: “Kyua tlâo mta klei Israel gao klei bhiăn, wăt pă mta mơh, Kâo amâo srăng bi mlih ôh klei Kâo bi kmhal; kyuadah diñu čhĭ pô kpă bi mlih hŏng prăk, leh anăn mnuih ƀun ƀin hŏng sa hlâo klĭt juă.

⁷ Diñu juă boh kŏ phung ƀun ƀin hlăm ƀruih lăn, leh anăn bi weh hĕ klei djŏ kơ phung arăng bi knap. Sa čô êkei leh anăn ama ñu nao kơ sa čô mniê, snăn bi čhŏ anăn doh jăk Kâo.

⁸ Diñu đih giăm grăp knưl ti dlông čhiăm diñu mă jing mnơ̆ng mgơ̆ng; leh anăn hlăm sang yang diñu, diñu mnăm kpiê mơ̆ng phung arăng đŭ leh.

⁹ Ƀiădah Kâo bi rai leh phung Amôrit ti anăp diñu, awan digơ̆ jing msĕ si awan ana kyâo sêdar, leh anăn jing ktang msĕ si ana kyâo sen. Kâo bi rai leh boh digơ̆ ti dlông, leh anăn agha digơ̆ ti gŭ.

¹⁰ Msĕ mơh Kâo bi kbiă diih leh mơ̆ng čar Êjip, leh anăn atăt diih êjai pă pluh thŭn hlăm kdrăn tač, čiăng kơ diih mă bha čar phung Amôrit.

¹¹ Mơ̆ng phung anak êkei diih Kâo mjing leh phung khua pô hưn êlâo, leh anăn đa đa phung êkei hlăk ai Kâo mjing phung Nasirit. Amâo djŏ hĕ snăn, Ơ phung anak čô Israel?” Yêhôwa lač.

¹² “Ƀiădah diih bi mnăm leh kpiê kơ phung Nasirit, leh anăn diih mtă leh kơ phung khua pô hưn êlâo, ‘Đăm diih hưn êlâo ôh.’

¹³ Nĕ anei, diih bi ktrŏ Kâo msĕ si sa boh êdeh bŏ hŏng čăp mdiê.

¹⁴ Pô êran pral amâo srăng dưi đuĕ ôh, pô ktang amâo srăng dưi pioh klei ktang ñu ôh, kăn pô jhŏng ktang srăng dưi bi mtlaih klei hdĭp ñu rei.

¹⁵ Pô djă hna amâo srăng dưi bi kdơ̆ng ôh, leh anăn kahan êran pral amâo srăng bi mtlaih ñu pô ôh, kăn pô đĭ aseh srăng bi mtlaih klei hdĭp ñu rei.

¹⁶ Leh anăn pô jhŏng hĭn hlăm phung kahan srăng đuĕ lưng mlŭn hlăm hruê anăn,” Yêhôwa lač.