Klei Yap 12 - Klei Aê Diê Blŭ 2015

H'Miriam leh anăn Y-Arôn Blŭ Bi Kdơ̆ng hŏng Y-Môis

¹ H'Miriam leh anăn Y-Arôn blŭ bi kdơ̆ng hŏng Y-Môis kyua gơ̆ dôk mô̆ leh sa čô mniê Kus.

² Diñu lač, “Djŏ mơ̆ knŏng hŏng Y-Môis hĕ Yêhôwa blŭ leh? Amâo djŏ hĕ Ñu blŭ leh hŏng drei mơh?” Leh anăn Yêhôwa hmư̆ klei anăn.

³ Y-Môis jing sa čô êkei luă gŭ hĭn kơ jih jang mnuih ti rŏng lăn ala.

⁴ Bhiâo riâo rit Yêhôwa lač kơ Y-Môis, kơ Y-Arôn, leh anăn kơ H'Miriam, “Hriê bĕ jih diih tlâo kơ sang čhiăm klei bi kƀĭn.” Leh anăn tlâo čô diñu kbiă nao.

⁵ Yêhôwa trŭn hriê hlăm kmeh knam leh anăn dôk ti ƀăng bhă sang čhiăm, iêô Y-Arôn leh anăn H'Miriam; leh anăn jih dua diñu nao phă anăp.

⁶ Ñu lač, “Dôk hmư̆ klei Kâo blŭ: Tơdah mâo khua pô hưn êlâo hlăm phung diih, Kâo gơ̆ Yêhôwa, Pô bi êdah Kâo pô kơ diñu hlăm klei bi ƀuh, Kâo blŭ kơ diñu hlăm klei êpei.

⁷ Amâo djŏ snăn ôh hŏng dĭng buăl Kâo Y-Môis; ñu sĭt suôr leh hlăm jih bruă sang Kâo.

⁸ Kâo blŭ hŏng ñu ƀăng êgei kơ ƀăng êgei hŏng klei mngač, amâo djŏ hŏng klei blŭ bi hgăm ôh; leh anăn ñu ƀuh rup Yêhôwa. Snăn si ngă diih amâo huĭ blŭ bi kdơ̆ng hŏng dĭng buăl Kâo Y-Môis?”

⁹ Klei Yêhôwa ngêñ trơ̆ng kơ diñu, leh anăn Ñu đuĕ nao.

¹⁰ Tơdah knam đĭ đuĕ mơ̆ng sang čhiăm, nĕ anei H'Miriam djŏ phŭng, jing kô̆ msĕ si pliêr. Y-Arôn wir dlăng phă H'Miriam leh anăn nĕ anei, gơ̆ djŏ phŭng leh.

¹¹ Y-Arôn lač kơ Y-Môis, “Ơ khua kâo, đăm bi kmhal hmei ôh kyuadah hmei ngă leh hŏng klei mluk leh anăn ngă soh leh.

¹² Đăm brei gơ̆ jing msĕ si sa čô hđeh ĭ djiê ksŏk, mkrah wah kđeh gơ̆ rai leh, tơdah gơ̆ kbiă mơ̆ng tian amĭ gơ̆.”

¹³ Y-Môis ur kơ Yêhôwa, “Ơ Aê Diê, kâo kwưh kơ Ih, bi hlao brei gơ̆.”

¹⁴ Ƀiădah Yêhôwa lač kơ Y-Môis, “Tơdah ama ñu kčuh leh êa bah ti ƀô̆ mta ñu, amâo djŏ hĕ ñu srăng hêñ êjai kjuh hruê? Brei arăng krư̆ ñu ti êngao wăl êjai kjuh hruê; leh klei anăn arăng dưi lŏ atăt ñu hlăm wăl.”

¹⁵ Snăn arăng krư̆ H'Miriam ti êngao wăl êjai kjuh hruê; leh anăn phung ƀuôn sang amâo đuĕ nao ôh tơl arăng lŏ atăt leh H'Miriam kơ wăl.

¹⁶ Leh klei anăn phung ƀuôn sang đuĕ nao mơ̆ng Hasêrôt leh anăn dôk jưh hlăm kdrăn tač Paran.