Klei Mphŭn Dơ̆ng 5 - Klei Aê Diê Blŭ 2015

Phung Anak Čô Y-Ađam

¹ Anei jing klei čih djŏ kơ phung anak čô Y-Ađam. Tơdah Aê Diê hrih mnuih, Ñu mjing digơ̆ tui si rup Aê Diê pô.

² Ñu hrih digơ̆ êkei mniê leh anăn hơêč hmưi kơ digơ̆. Ñu bi anăn digơ̆ “mnuih” hruê Ñu hrih digơ̆.

³ Tơdah Y-Ađam dôk hdĭp leh sa êtuh tlâo pluh thŭn, ñu mâo sa čô anak êkei msĕ si ñu, tui si rup ñu, leh anăn bi anăn gơ̆ Y-Set.

⁴ Leh kkiêng kơ Y-Set, Y-Ađam dôk hdĭp sa păn êtuh thŭn leh anăn ñu lŏ mâo phung anak êkei leh anăn phung anak mniê.

⁵ Jih jang hruê Y-Ađam dôk hdĭp mâo dua păn êtuh tlâo pluh thŭn, leh anăn ñu djiê.

⁶ Tơdah Y-Set mâo leh sa êtuh êma thŭn, ñu mâo anak, anăn gơ̆ Y-Ênôs.

⁷ Leh kkiêng kơ Y-Ênôs, Y-Set dôk hdĭp sa păn êtuh kjuh thŭn, leh anăn ñu lŏ mâo phung anak êkei leh anăn phung anak mniê.

⁸ Jih jang hruê Y-Set dôk hdĭp mâo dua păn êtuh pluh dua thŭn, leh anăn ñu djiê.

⁹ Tơdah Y-Ênôs mâo leh dua păn pluh thŭn, ñu mâo anak, anăn gơ̆ Y-Kênan.

¹⁰ Leh kkiêng kơ Y-Kênan, Y-Ênôs dôk hdĭp sa păn êtuh pluh êma thŭn, leh anăn ñu lŏ mâo phung anak êkei leh anăn phung anak mniê.

¹¹ Jih jang hruê Y-Ênôs dôk hdĭp mâo dua păn êtuh êma thŭn, leh anăn ñu djiê.

¹² Tơdah Y-Kênan mâo leh kjuh pluh thŭn, ñu mâo anak, anăn gơ̆ Y-Mahalalel.

¹³ Leh kkiêng kơ Y-Mahalalel, Y-Kênan dôk hdĭp sa păn êtuh pă pluh thŭn, leh anăn ñu lŏ mâo phung anak êkei leh anăn phung anak mniê.

¹⁴ Jih jang hruê Y-Kênan dôk hdĭp mâo dua păn êtuh pluh thŭn, leh anăn ñu djiê.

¹⁵ Tơdah Y-Mahalalel mâo leh năm pluh êma thŭn, ñu mâo anak, anăn gơ̆ Y-Jaret.

¹⁶ Leh kkiêng kơ Y-Jaret, Y-Mahalalel dôk hdĭp sa păn êtuh tlâo pluh thŭn, leh anăn ñu lŏ mâo phung anak êkei leh anăn phung anak mniê.

¹⁷ Jih jang hruê Y-Mahalalel dôk hdĭp mâo sa păn êtuh dua păn pluh êma thŭn, leh anăn ñu djiê.

¹⁸ Tơdah Y-Jaret mâo leh sa êtuh năm pluh dua thŭn, ñu mâo anak, anăn gơ̆ Y-Ênŏk.

¹⁹ Leh kkiêng kơ Y-Ênŏk, Y-Jaret dôk hdĭp sa păn êtuh thŭn, leh anăn ñu lŏ mâo phung anak êkei leh anăn phung anak mniê.

²⁰ Jih jang hruê Y-Jaret dôk hdĭp mâo dua păn êtuh năm pluh dua thŭn, leh anăn ñu djiê.

²¹ Tơdah Y-Ênŏk mâo leh năm pluh êma thŭn, ñu mâo anak, anăn gơ̆ Y-Mêthusêla.

²² Leh kkiêng kơ Y-Mêthusêla, Y-Ênŏk êbat mbĭt hŏng Aê Diê tlâo êtuh thŭn, leh anăn ñu lŏ mâo phung anak êkei leh anăn phung anak mniê.

²³ Jih jang hruê Y-Ênŏk dôk hdĭp mâo tlâo êtuh năm pluh êma thŭn.

²⁴ Y-Ênŏk êbat mbĭt hŏng Aê Diê, êdei tinăn arăng amâo lŏ ƀuh ñu ôh, kyuadah Aê Diê mă ba ñu leh.

²⁵ Tơdah Y-Mêthusêla mâo leh sa êtuh sa păn pluh kjuh thŭn, ñu mâo anak, anăn gơ̆ Y-Lamek.

²⁶ Leh kkiêng kơ Y-Lamek, Y-Mêthusêla dôk hdĭp kjuh êtuh sa păn pluh dua thŭn, leh anăn ñu lŏ mâo phung anak êkei leh anăn phung anak mniê.

²⁷ Jih jang hruê Y-Mêthusêla dôk hdĭp mâo dua păn êtuh năm pluh dua păn thŭn, leh anăn ñu djiê.

²⁸ Tơdah Y-Lamek mâo leh sa êtuh sa păn pluh dua thŭn, ñu mâo anak êkei.

²⁹ Ñu bi anăn gơ̆ Y-Nôê leh anăn lač, “Pô anei srăng bi juh drei hlăm bruă drei leh anăn hlăm klei suăi kngan drei ngă kyuadah lăn Khua Yang tăm pah leh.”

³⁰ Leh kkiêng kơ Y-Nôê, Y-Lamek dôk hdĭp êma êtuh dua păn pluh êma thŭn, leh anăn ñu lŏ mâo phung anak êkei leh anăn phung anak mniê.

³¹ Jih jang hruê Y-Lamek dôk hdĭp mâo kjuh êtuh kjuh pluh kjuh thŭn, leh anăn ñu djiê.

³² Tơdah Y-Nôê mâo leh êma êtuh thŭn, Y-Nôê mâo tlâo čô anak êkei, anăn digơ̆ Y-Sem, Y-Čam, leh anăn Y-Japhet.