Klei Mmuñ Hđăp 99 - Klei Aê Diê Blŭ 2015

Yêhôwa Kiă Kriê

¹ Yêhôwa kiă kriê, phung ƀuôn sang ktư̆ yơ̆ng; Ñu dôk gŭ ti dlông phung čêrubim, lăn ala mgei.

² Yêhôwa jing prŏng hlăm ƀuôn Siôn, leh anăn arăng mpŭ Ñu ti dlông jih jang phung ƀuôn sang.

³ Brei diñu bi mni kơ anăn Ih prŏng leh anăn năng kơ arăng huĭ; Ñu yơh jing doh jăk.

⁴ Mtao jing Pô myang, Ñu khăp kơ klei kpă; Ih mdơ̆ng klei djŏ, Ih ngă klei phat kđi djŏ leh anăn klei kpă ênô hlăm phung Yakôp.

⁵ Mpŭ mni bĕ kơ Yêhôwa Aê Diê drei, buôn kkuh bĕ ti anăp mdhô̆ Ñu trông jơ̆ng; Ñu yơh jing doh jăk.

⁶ Y-Môis leh anăn Y-Arôn jing hlăm phung khua ngă yang Ñu, leh anăn Y-Samuel jing sa hlăm phung iêô wah lač kơ anăn Ñu. Digơ̆ iêô wah lač kơ Yêhôwa, leh anăn Ñu lŏ wĭt lač kơ digơ̆.

⁷ Yêhôwa blŭ kơ digơ̆ hlăm kmeh knam; digơ̆ djă pioh klei Yêhôwa hưn leh anăn klei bhiăn Ñu brei leh kơ digơ̆.

⁸ Ơ Yêhôwa, Aê Diê hmei, Ih yơh lŏ wĭt lač leh kơ diñu; Ih jing Aê Diê thâo pap brei kơ diñu, ƀiădah Ih bi kmhal klei diñu ngă soh.

⁹ Mpŭ mni bĕ kơ Yêhôwa Aê Diê drei, leh anăn kkuh mpŭ bĕ ti čư̆ doh jăk Ñu; kyuadah Yêhôwa Aê Diê drei jing doh jăk.