Klei Mmuñ Hđăp 98 - Klei Aê Diê Blŭ 2015

Yêhôwa Kiă Kriê Lăn Ala

Klei mmuñ hđăp.

¹ Mmuñ bĕ kơ Yêhôwa klei mmuñ mrâo; kyuadah Ñu ngă leh klei yuôm bhăn. Kngan hnuă leh anăn păl doh jăk Ñu brei Ñu mâo leh klei dưi.

² Yêhôwa bi êdah leh klei Ñu bi mtlaih; Ñu bi êdah leh klei kpă ênô Ñu ti anăp phung găp djuê mnuih.

³ Ñu hdơr leh kơ klei khăp Ñu leh anăn klei sĭt suôr Ñu hŏng sang Israel. Jih jang knhal lăn ala ƀuh leh klei bi mtlaih Aê Diê drei.

⁴ Ur hơ̆k bĕ kơ Yêhôwa, Ơ jih jang phung ti lăn ala; ur, mmuñ mơak bĕ, leh anăn mmuñ bi mni bĕ.

⁵ Mmuñ bi mni bĕ kơ Yêhôwa hŏng đĭng brô̆, hŏng đĭng brô̆ leh anăn mmuñ siam,

⁶ hŏng ki leh anăn hŏng asăp ki bê knô. Ur hơ̆k bĕ ti anăp Yêhôwa, Pô jing mtao.

⁷ Brei êa ksĭ, wăt jih jang mnơ̆ng hlăm ñu, Brei lăn ala, wăt phung dôk hlăm ñu, ur hơ̆k bĕ!

⁸ Brei jih jang êa krông pah kngan; brei jih jang čư̆ mmuñ hơ̆k mđrăm mbĭt,

⁹ ti anăp Yêhôwa, kyuadah Ñu hriê phat kđi lăn ala. Ñu srăng phat kđi lăn ala hŏng klei kpă ênô, leh anăn phung ƀuôn sang hŏng klei djŏ.