Klei Mmuñ Hđăp 97 - Klei Aê Diê Blŭ 2015

Yêhôwa Jing Pô Kiă Kriê

¹ Yêhôwa kiă kriê, brei lăn ala mâo klei hơ̆k mơak; brei phung čar ti hang êa ksĭ mâo klei mơak.

² Knam leh anăn klei mmăt dôk jŭm Ñu; klei kpă ênô leh anăn klei djŏ jing atur kơ jhưng mtao Ñu.

³ Pui nao ti anăp Ñu, leh anăn čuh phung roh dôk jŭm dar Ñu.

⁴ Kmlă Ñu bi mngač lăn ala; Boh lăn ƀuh leh anăn ktư̆ yơ̆ng.

⁵ Jih jang čư̆ lik msĕ si hlĭn ti anăp Yêhôwa, ti anăp Khua Yang kơ jih lăn ala.

⁶ Jih adiê hưn klei kpă ênô Ñu, leh anăn jih jang phung ƀuôn sang ƀuh klei guh kơang Ñu.

⁷ Arăng bi hêñ leh jih jang phung kkuh kơ rup yang, phung knang kơ rup yang hơăi mang diñu; Ơ jih jang yang, kkuh mpŭ bĕ kơ Yêhôwa.

⁸ Ƀuôn Siôn hmư̆ klei anăn leh anăn mơak, phung anak mniê Yuđa hơ̆k kdơ̆k, kyua klei Ih phat kđi, Ơ Yêhôwa.

⁹ Kyuadah Ih yơh, Ơ Yêhôwa, jing Pô ti dlông hĭn kơ jih lăn ala; Ih mâo klei mpŭ lu hĭn kơ jih jang yang.

¹⁰ Brei phung khăp kơ Yêhôwa bi êmut kơ klei jhat; Ñu mgang klei hdĭp phung sĭt suôr hŏng Ñu; Ñu bi mtlaih digơ̆ mơ̆ng kngan phung ƀai.

¹¹ Klei mngač mtrang kơ phung kpă ênô, leh anăn klei mơak bi bŏ ai tiê phung kpă.

¹² Ơ phung kpă ênô, mơak bĕ diih hlăm Yêhôwa; leh anăn hdơr bi mni kơ anăn doh jăk Ñu.