Klei Mmuñ Hđăp 89 - Klei Aê Diê Blŭ 2015

Klei Mmuñ Êjai Čar Mâo Klei Rŭng Răng

Klei Y-Êthan, mnuih Êsrahit, mtô mjuăt.

¹ Kâo srăng mmuñ nanao kơ klei jăk Yêhôwa; ƀăng êgei kâo srăng hưn klei sĭt suôr Ih hlăm jih jang ênuk.

² Kâo hưn klei Ih khăp srăng dôk kjăp hlŏng lar; Ih bi kjăp klei Ih sĭt suôr hlăm jih adiê.

³ Ih lač leh Kâo ngă klei bi mguôp hŏng pô Kâo ruah leh, Kâo kat asei leh kơ Y-Đawit, dĭng buăl Kâo:

⁴ Kâo srăng bi kjăp phung anak čô ih hlŏng lar, leh anăn mdơ̆ng jhưng mtao ih hlăm jih jang ênuk. (Sêla)

⁵ Ơ Yêhôwa, jih adiê bi mni kơ bruă yuôm bhăn Ih, leh anăn bi mni klei Ih sĭt suôr hlăm klei bi kƀĭn phung doh jăk.

⁶ Kyuadah hlei pô hlăm jih adiê arăng dưi bi mđơr hŏng Yêhôwa? Hlei pô hlăm phung anak êkei Aê Diê jing msĕ si Yêhôwa?

⁷ Aê Diê jing Pô arăng huĭ hlăm klei bi kƀĭn phung doh jăk. Leh anăn Ñu jing prŏng leh anăn năng huĭ hĭn kơ jih jang phung dôk jŭm Ñu.

⁸ Ơ Yêhôwa, Aê Diê kơ phung kahan, hlei pô myang msĕ si Ih, Ơ Yêhôwa? Klei sĭt suôr Ih dôk jŭm Ih.

⁹ Ih kiă kriê klei mgao êa ksĭ; tơdah êa ksĭ poh yă, Ih brei diñu dôk ngơ ngĭn.

¹⁰ Ih bi rai Rahap msĕ si sa asei mlei djiê; Ih prah prŭng leh phung roh Ih hŏng klei myang păl Ih.

¹¹ Jih adiê leh anăn lăn ala jing dŏ Ih; Ih yơh mdơ̆ng leh lăn ala leh anăn jih mnơ̆ng hlăm ñu.

¹² Ih hrih leh dưr leh anăn dhŭng; Čư̆ Tabor leh anăn čư̆ Hermôn ur hơ̆k kơ anăn Ih.

¹³ Păl Ih myang; kngan Ih ktang, leh anăn kngan hnuă Ih yơr ti dlông.

¹⁴ Klei kpă ênô leh anăn klei djŏ jing atur kơ jhưng mtao Ih; klei khăp leh anăn klei sĭt suôr nao ti anăp Ih.

¹⁵ Jăk mơak yơh kơ phung ƀuôn sang thâo bi mni kơ Ih, phung êbat hlăm klei mngač mơ̆ng ƀô̆ mta Ih, Ơ Yêhôwa.

¹⁶ Diñu hơ̆k mơak jih hruê hlăm anăn Ih; leh anăn hlăm klei kpă ênô Ih diñu mâo klei mpŭ.

¹⁷ Kyuadah Ih jing klei guh kơang klei ktang diñu; hŏng klei pap Ih yơh hmei mâo klei dưi hĭn.

¹⁸ Kyuadah Yêhôwa jing khil hmei; Pô Doh Jăk Israel jing mtao hmei.

¹⁹ Hlăk anăn, Ih blŭ kơ phung doh jăk Ih hlăm klei bi ƀuh, leh anăn lač: “Kâo brei leh sa čô jhŏng ktang kăp đru; kâo bi mđĭ leh sa čô êkei hlăk ai mơ̆ng phung ƀuôn sang.

²⁰ Kâo ƀuh leh Y-Đawit, dĭng buăl Kâo; Kâo trôč êa ƀâo mngưi doh jăk Kâo ti ñu.

²¹ Snăn kơh kngan Kâo srăng krơ̆ng ñu nanao; leh anăn păl Kâo srăng bi ktang ñu.

²² Pô roh amâo srăng dưi hŏng ñu ôh, pô ƀai kăn srăng ktư̆ juă ñu rei.

²³ Kâo srăng bi rai phung roh ñu ti anăp ñu, leh anăn Kâo srăng bi êbuh phung bi êmut kơ ñu.

²⁴ Klei sĭt suôr leh anăn klei khăp Kâo srăng dôk mbĭt hŏng ñu; leh anăn hlăm anăn Kâo, ki ñu srăng bi mđĭ.

²⁵ Kâo srăng dưm kngan ñu ti êa ksĭ, leh anăn kngan hnuă ñu ti êa krông.

²⁶ Ñu srăng ur kơ Kâo: ‘Ih jing Ama kâo, Aê Diê kâo, leh anăn Boh Tâo klei bi mtlaih kâo.’

²⁷ Leh anăn Kâo srăng brei ñu jing anak êkei Kâo kkiêng tal êlâo, mtao prŏng hĭn kơ phung mtao ti lăn ala.

²⁸ Kâo srăng pioh klei khăp Kâo kơ ñu hlŏng lar; klei Kâo bi mguôp srăng dôk kjăp hŏng ñu.

²⁹ Kâo srăng brei phung anak čô ñu jing mtao hlŏng lar, leh anăn jhưng mtao ñu srăng dôk sui msĕ si phung adiê.

³⁰ Tơdah phung anak ñu lui klei bhiăn Kâo, leh anăn amâo êbat ôh tui si klei Kâo mtă;

³¹ tơdah diñu gao klei bhiăn Kâo, leh anăn amâo djă pioh ôh klei Kâo mtă;

³² snăn Kâo srăng bi kmhal hŏng giê klei diñu gao klei bhiăn, leh anăn čăm diñu kyua klei wê diñu.

³³ Ƀiădah Kâo amâo srăng sua mă klei khăp Kâo mơ̆ng Y-Đawit ôh. Kăn Kâo srăng lui rei klei Kâo sĭt suôr hŏng ñu.

³⁴ Kâo amâo srăng gao klei Kâo bi mguôp ôh, kăn Kâo srăng bi mlih rei ya klei kbiă leh mơ̆ng ƀăng kƀông Kâo.

³⁵ Hŏng klei doh jăk Kâo, Kâo kat asei leh sa blư̆, Kâo amâo srăng luar ôh kơ Y-Đawit:

³⁶ Phung anak čô ñu srăng jing mtao hlŏng lar; dŭm boh sui yang hruê dôk, msĕ snăn mơh jhưng mtao ñu srăng dôk ti anăp Kâo.

³⁷ Ñu srăng dôk hlŏng lar msĕ si mlan; jing mnơ̆ng hưn sĭt suôr hlăm adiê.” (Sêla)

³⁸ Ƀiădah Ih bŏ hŏng klei ngêñ kơ pô Ih trôč leh êa ƀâo mngưi; Ih hngah leh anăn lui ñu.

³⁹ Ih hngah leh klei bi mguôp hŏng dĭng buăl Ih; Ih klư̆ bi čhŏ leh đuôn mtao ñu hlăm ƀruih lăn.

⁴⁰ Ih bi klưh leh jih mnư̆ kpal ñu; Ih bi rai leh jih kđông mgang ñu.

⁴¹ Jih jang phung găn tinăn plah mă mnơ̆ng ñu; phung riêng gah ñu bi êmut kơ ñu.

⁴² Ih bi mđĭ leh kngan hnuă phung roh ñu; Ih brei jih jang phung roh ñu hơ̆k mơak.

⁴³ Sĭt nik Ih mbliư̆ đao gưm ñu jing hơăi mang, leh anăn Ih amâo krơ̆ng ñu ôh hlăm klei bi blah.

⁴⁴ Ih bi luč leh klei guh kơang ñu, leh anăn Ih klư̆ hĕ leh jhưng mtao ñu ti lăn.

⁴⁵ Ih bi hrŏ leh hruê ñu jing hlăk ai; Ih guôm ñu leh hŏng klei hêñ. (Sêla)

⁴⁶ Dŭm boh sui, Ơ Yêhôwa? Ih srăng mdăp Ih pô nanao mơ̆? Dŭm boh sui klei Ih ngêñ srăng čuh msĕ si pui?

⁴⁷ Ơ Yêhôwa, brei Ih hdơr kơ ênuk mnuih jing đŭt; klei Ih hrih mnuih jing hơăi mang hĕ?

⁴⁸ Hlei mnuih dưi dôk hdĭp leh anăn amâo tuôm djiê ôh? Hlei pô dưi bi mtlaih mngăt ñu pô mơ̆ng klei myang Ƀuôn Phung Djiê? (Sêla)

⁴⁹ Ơ Khua Yang, ti klei khăp Ih mơ̆ng ênuk đưm, klei Ih kat asei leh kơ Y-Đawit hlăm klei Ih dôk sĭt suôr?

⁵⁰ Ơ Khua Yang, hdơr bĕ kơ klei arăng mưč phung dĭng buăl Ih; kơ klei kâo klam hlăm ai tiê jih jang klei phung ƀuôn sang dlao wač,

⁵¹ klei phung roh Ih mưč, Ơ Yêhôwa, klei diñu mưč kơ knhuang êbat pô Ih trôč leh êa ƀâo mngưi.

⁵² Mpŭ bi mni kơ Yêhôwa hlŏng lar. Amen. Amen.