Klei Mmuñ Hđăp 83 - Klei Aê Diê Blŭ 2015

Klei Wah Lač Akâo kơ Aê Diê Brei Phung Israel Dưi

Klei mmuñ. Klei mmuñ hđăp Y-Asap.

¹ Ơ Aê Diê, đăm dôk ñăt ôh; đăm dôk kriêp, amâo ngă sa mnơ̆ng ôh, Ơ Aê Diê.

² Kyuadah nĕ anei, phung roh Ih ngă klei rŭng răng; phung bi êmut kơ Ih kngưr boh kŏ.

³ Hŏng klei mnêč diñu mkra hdră čiăng ngă kơ phung ƀuôn sang Ih; diñu trông čhai čiăng ngă kơ phung Ih khăp.

⁴ Diñu lač, Bơ drei bi luč hĕ diñu mơ̆ng phung găp djuê; čiăng kơ arăng amâo lŏ hdơr ôh kơ anăn Israel.

⁵ Sĭt nik diñu bi trông čhai leh sa ai; diñu ngă klei bi mguôp čiăng bi kdơ̆ng hŏng Ih:

⁶ sang čhiăm phung Êđôm leh anăn phung Ismael; phung Môap leh anăn phung Hagar;

⁷ phung Gêbal, phung Amôn, leh anăn phung Amalek; phung Philistin mbĭt hŏng phung ƀuôn sang Tir;

⁸ phung Asiri bi mguôp hŏng diñu mơh, jing phung ktang đru phung anak čô Y-Lot. (Sêla)

⁹ Ngă bĕ kơ diñu msĕ si Ih ngă leh kơ phung Madian, msĕ si kơ Y-Sisêra leh anăn kơ Y-Jabin ti êa krông Kisôn.

¹⁰ Diñu rai leh ti ƀuôn Ên-Dor, diñu jing msĕ si hbâo bi jing lăn.

¹¹ Ngă kơ khua diñu msĕ si Ih ngă leh kơ Y-Ôrep leh anăn Y-Sêep; leh anăn kơ jih jang phung khua diñu msĕ si Y-Sêbal leh anăn Y-Salmuna.

¹² Phung anăn lač, Brei drei plah mă rơ̆k mda Aê Diê.

¹³ Ơ Aê Diê kâo, brei diñu jing msĕ si ƀruih hlăm angĭn đrŭng, msĕ si adrăng angĭn kpuh mđung.

¹⁴ Msĕ si pui dôk ƀơ̆ng kmrơ̆ng, msĕ si êlah pui dôk ƀơ̆ng čư̆.

¹⁵ Snăn mơh tiŏ diñu hŏng angĭn êbŭ Ih, leh anăn bi huĭ diñu hŏng angĭn đrŭng Ih.

¹⁶ Brei diñu bŏ hŏng klei hêñ, čiăng kơ diñu duah anăn Ih, Ơ Yêhôwa.

¹⁷ Bi hêñ leh anăn bi rŭng diñu nanao; brei diñu rai tuč hŏng klei hêñ.

¹⁸ Brei diñu thâo knŏng Ih yơh Yêhôwa, jing Pô Ti Dlông Hĭn kiă kriê jih lăn ala.