Klei Mmuñ Hđăp 73 - Klei Aê Diê Blŭ 2015

TRĂN TAL TLÂO Klei Aê Diê Phat Kđi Kpă

Klei mmuñ hđăp Y-Asap.

¹ Sĭt nik Aê Diê ngă klei jăk kơ phung Israel, kơ phung mâo ai tiê doh.

² Ƀiădah bi kâo dê, jơ̆ng kâo păt čiăng lĕ buh, jơ̆ng kâo dơ̆ng ksak.

³ Kyuadah kâo tluh kơ phung mgao, tơdah kâo ƀuh klei mdrŏng sah phung ƀai.

⁴ Kyuadah diñu amâo mâo klei ruă ôh; asei mlei diñu ktang leh anăn suaih pral.

⁵ Diñu amâo mâo klei rŭng răng ôh msĕ si phung mkăn; arăng amâo bi knap diñu ôh msĕ si phung mkăn.

⁶ Kyuanăn klei mgao jing kông mah diñu băk; klei măk ƀai jing čhiăm ao diñu hơô.

⁷ Ală diñu sir kyua êmŏng; klei mĭn ai tiê diñu bŏ dlai hŏng klei mluk

⁸ Diñu mưč leh anăn blŭ klei ƀai; hŏng klei mgao diñu arưp aram ktư̆ juă.

⁹ Ƀăng êgei diñu blŭ bi kdơ̆ng hŏng adiê, leh anăn êlah diñu blŭ mgao kơ jih mnuih ti lăn ala.

¹⁰ Kyuanăn phung ƀuôn sang lŏ wĭt hlue diñu, leh anăn diñu lun êa lu êbeh.

¹¹ Leh anăn diñu lač, “Si Aê Diê dưi thâo? Si Pô Ti Dlông Hĭn dưi ƀuh?”

¹² Nĕ anei, msĕ snei phung ƀai; diñu dôk êđăp ênang nanao, diñu mdrŏng hĭn êjai.

¹³ Snăn amâo yuôm ôh kâo bi doh leh ai tiê kâo, leh anăn pioh kngan kâo amâo tuôm soh ôh.

¹⁴ Kyuadah jih hruê arăng čăm kâo, grăp aguah arăng bi kmhal kâo.

¹⁵ Tơdah kâo lač leh, kâo srăng blŭ msĕ snei, kâo lhiăr kơ phung ƀuôn sang Ih.

¹⁶ Ƀiădah tơdah kâo duah čiăng thâo săng klei anăn, ñu jing klei dleh prŏng kơ kâo,

¹⁷ tơl kâo mŭt leh hlăm adŭ doh jăk Aê Diê, hlăk anăn kâo thâo săng klei srăng truh kơ diñu ti hruê knhal tuč.

¹⁸ Sĭt nik Ih dưm diñu ti êlan êbhơr; Ih bi êbuh diñu brei diñu rai tuč.

¹⁹ Bhiâo riâo rit diñu rai tuč yơh! Klei huĭ prŏng bi luč diñu mtam!

²⁰ Diñu jing msĕ si klei êpei tơdah arăng mdih, tơdah Ih mdih, Ơ Khua Yang, Ih srăng bi êmut kơ diñu.

²¹ Êjai kâo ênguôt leh anăn ruă ai;

²² hlăk anăn kâo mluk leh anăn amâo thâo săng ôh; ti anăp ală Ih kâo jing msĕ si hlô.

²³ Wăt tơdah klei anăn dưn, kâo ăt dôk mbĭt hŏng Ih nanao; Ih djă kngan hnuă kâo.

²⁴ Ih atăt kâo hŏng klei Ih kčĕ, leh anăn êdei Ih srăng jum kâo hlăm klei guh kơang.

²⁵ Hlei pô mkăn kâo mâo hlăm adiê, knŏng Ih yơh. Leh anăn ti lăn ala kâo amâo čiăng kơ mnơ̆ng mkăn ôh, knŏng hjăn Ih.

²⁶ Kđeh leh anăn tiê boh kâo dưi luč, ƀiădah Aê Diê jing klei ktang kơ ai tiê kâo, leh anăn ngăn dưn kâo hlŏng lar.

²⁷ Kyuadah nĕ anei, phung dôk kbưi mơ̆ng Ih srăng rai tuč; Ih srăng bi rai phung amâo dôk sĭt suôr hŏng Ih ôh.

²⁸ Ƀiădah jing jăk kơ kâo dôk giăm Aê Diê. Kâo brei Khua Yang Yêhôwa jing anôk kâo đuĕ dăp, čiăng kâo dưi yăl dliê jih jang bruă Ih.