Klei Mmuñ Hđăp 7 - Klei Aê Diê Blŭ 2015

Klei Wah Lač Akâo kơ Klei Phat Kđi Kpă

Klei Y-Đawit mmuñ kơ Yêhôwa kyua klei Y-Kus, sa čô Benjamin blŭ.

¹ Ơ Yêhôwa, Aê Diê kâo, hlăm Ih kâo đuĕ dăp; dŏng kâo mơ̆ng jih jang phung tiŏ ngă kơ kâo, leh anăn bi mtlaih kâo,

² huĭdah diñu hiêk kâo msĕ si êmông gu, ktŭng mđuĕ kâo, amâo mâo pô dưi đru kâo ôh.

³ Ơ Yêhôwa, Aê Diê kâo, tơdah kâo ngă leh klei anei, tơdah kngan kâo ngă klei wê,

⁴ tơdah kâo bi wĭt klei jhat kơ mah jiăng kâo, amâodah plah mă dŏ dô pô roh amâo mâo klei ôh,

⁵ snăn brei pô roh tiŏ kâo tơl hmao, brei ñu juă klei hdĭp kâo, leh anăn dlăm klei guh kơang kâo kơ bruih lăn. (Sêla)

⁶ Ơ Yêhôwa, kgŭ bĕ Ih hlăm klei Ih ăl, kgŭ bĕ Ih bi blah hŏng klei ngêñ phung roh kâo; mdih bĕ Ih, Ơ Aê Diê kâo, leh anăn đru kâo đa; Ih mkra leh klei phat kđi.

⁷ Brei phung mnuih bi kƀĭn jŭm dar Ih; brei Ih jing khua kơ diñu hlăm adiê.

⁸ Yêhôwa phat kđi phung ƀuôn sang; Phat kđi kâo bi kpă, Ơ Yêhôwa, tui si klei kpă ênô kâo leh anăn klei sĭt nik dôk hlăm kâo.

⁹ Brei klei soh phung ƀai tuč ruê̆, ƀiădah bi kjăp phung kpă, Ơ Aê Diê kpă, Pô ksiêm dlăng klei mĭn leh anăn ai tiê.

¹⁰ Aê Diê jing khil kâo; Ñu bi mtlaih phung mâo ai tiê kpă.

¹¹ Aê Diê jing khua phat kđi kpă, leh anăn Aê Diê pô mâo klei ăl grăp hruê kơ phung ƀai.

¹² Tơdah pô ƀai amâo kmhal kơ klei soh ôh, Aê Diê srăng sah đao gưm Ñu; Ñu ƀêč hna Ñu leh anăn kliêng.

¹³ Aê Diê mkra leh mnơ̆ng bi mdjiê, Ñu mkra ƀrăm pui.

¹⁴ Nĕ anei, mnuih ƀai kkiêng klei jhat; ñu ƀă klei wê, leh anăn kkiêng klei luar.

¹⁵ Ñu klei ƀăng êlam, leh anăn lĕ hlăm ƀăng ñu pô ngă leh.

¹⁶ Klei ƀai ñu srăng lŏ wĭt ti dlông boh kŏ ñu pô, leh anăn klei jhat ñu srăng lĕ ti adhei ñu.

¹⁷ Kâo srăng bi mni kơ Yêhôwa kyua klei kpă ênô Ñu, kâo srăng mmuñ bi mni kơ anăn Yêhôwa, Pô Ti Dlông Hĭn.