Klei Mmuñ Hđăp 61 - Klei Aê Diê Blŭ 2015

Klei Wah Lač Knang kơ Klei Aê Diê Myang

Kơ khua phung mmuñ: hŏng đĭng brô̆. Klei mmuñ hđăp Y-Đawit.

¹ Ơ Aê Diê, dôk hmư̆ klei kâo ur krao, mđing knga kơ klei kâo wah lač.

² Mơ̆ng knhal lăn ala kâo iêô Ih, tơdah ai tiê kâo êdu ai leh. Atăt kâo kơ boh tâo dlông hĭn kơ kâo,

³ kyuadah Ih jing anôk kâo đuĕ dăp, sa boh sang tum kjăp bi kdơ̆ng hŏng phung roh.

⁴ Brei kâo dôk hlăm sang čhiăm Ih hlŏng lar! Čiăng snăk kâo dưi dôk kđap ti gŭ siap Ih. (Sêla)

⁵ Kyuadah Ih, Ơ Aê Diê, hmư̆ leh klei kâo ƀuăn, Ih brei leh kơ kâo ngăn dưn phung huĭ mpŭ kơ anăn Ih.

⁶ Brei Ih lŏ thiăm hruê kơ ênuk mtao dôk hdĭp, brei ñu dôk hdĭp hlăm lu ênuk.

⁷ Brei ñu dôk ti jhưng mtao hlŏng lar ti anăp Aê Diê; brei klei khăp Ih leh anăn klei Ih sĭt suôr kiă kriê ñu.

⁸ Snăn kâo srăng mmuñ bi mni kơ anăn Ih hlŏng lar, êjai kâo bi sĭt grăp hruê klei kâo ƀuăn.