Klei Mmuñ Hđăp 6 - Klei Aê Diê Blŭ 2015

Klei Wah Lač Akâo Klei Pap Hlăm Mmông Knap Mñai

Kơ khua phung mmuñ: hŏng brô̆, đjŏ kơ đŏk Sêminit. Klei mmuñ hđăp Y-Đawit.

¹ Ơ Yêhôwa, đăm ƀuah kâo ôh êjai Ih ăl, kăn bi kmhal kâo rei êjai Ih ngêñ.

² Pap mñai kơ kâo, Ơ Yêhôwa, kyuadah kâo jing awăt; Ơ Yêhôwa, bi hlao kâo kyuadah klang kâo ruă.

³ Wăt mngăt kâo rŭng răng snăk. Bi Ih, Ơ Yêhôwa, dŭm boh sui Ih dôk guôn čiăng đru kâo?

⁴ Lŏ hriê, Ơ Yêhôwa, bi mtlaih mngăt kâo; bi mtlaih kâo kyua klei khăp Ih.

⁵ Kyuadah hlăm klei djiê amâo lŏ mâo klei hdơr kơ Ih ôh; hlei dưi mpŭ mni kơ Ih hlăm Ƀuôn Phung Djiê?

⁶ Kâo jih ai leh hŏng klei kâo krao; grăp mlam kâo hia tơl jhưng pĭt kâo msah hŏng êa ală; Anal kŏ kâo msah hŏng klei kâo hia.

⁷ Ală kâo dliu hŏng klei ênguôt, ñu jing awăt leh kyua jih jang phung roh kâo.

⁸ Đuĕ bĕ mơ̆ng kâo, Ơ diih jih jang phung ngă klei wê, kyuadah Yêhôwa hmư̆ leh asăp kâo hia.

⁹ Yêhôwa hmư̆ leh klei kâo kwưh; Yêhôwa tŭ leh klei kâo wah lač.

¹⁰ Jih jang phung roh kâo srăng hêñ leh anăn rŭng snăk; diñu srăng kdŭn đuĕ, leh anăn mâo klei hêñ mtam.