Klei Mmuñ Hđăp 51 - Klei Aê Diê Blŭ 2015

Klei Wah Lač Akâo Klei Pap Brei

Kơ khua phung mmuñ. Klei mmuñ hđăp Y-Đawit, hlăk khua pô hưn êlâo Y-Nathan hriê kơ ñu leh ñu ngă soh hŏng H'Batsêba.

¹ Ơ Aê Diê, pap mñai kơ kâo tui si klei khăp sĭt suôr Ih; leh anăn lăm klei kâo gao klei bhiăn tui si klei pap prŏng Ih.

² Rao kâo bi doh mơ̆ng jih klei wê kâo, leh anăn bi doh kâo mơ̆ng klei soh kâo.

³ Kyuadah kâo thâo kral klei kâo gao klei bhiăn, leh anăn klei soh kâo dôk ti anăp kâo nanao.

⁴ Kâo ngă soh hŏng Ih, knŏng hŏng Ih yơh, leh anăn kâo ngă leh klei jhat ƀai ti anăp ală Ih; snăn Ih jing kpă tơdah Ih blŭ kđi, leh anăn amâo mâo klei arăng dưi ƀuah ôh tơdah Ih bi kmhal kâo.

⁵ Nĕ anei, arăng kkiêng kơ kâo leh hlăm klei wê, leh anăn amĭ kâo ba tian kơ kâo leh hlăm klei soh.

⁶ Nĕ anei, Ih čiăng ƀuh klei sĭt nik hlăm ai tiê; kyuanăn bi hriăm kâo mâo klei knhâo hlăm ai tiê hgăm kâo.

⁷ Bi doh kâo hŏng rơ̆k hisôp leh anăn kâo srăng jing doh; rao kâo, leh anăn kâo srăng jing kô̆ hĭn kơ pliêr.

⁸ Brei kâo hmư̆ klei hơ̆k kdơ̆k leh anăn klei mơak; brei klang Ih bi joh leh dưi mâo klei hơ̆k.

⁹ Đăm lŏ dlăng kơ klei soh kâo ôh, leh anăn lăm hĕ jih klei wê kâo.

¹⁰ Ơ Aê Diê, hrih hlăm kâo ai tiê doh, leh anăn dưm hlăm kâo ai tiê mrâo leh anăn kpă.

¹¹ Đăm suôt kâo mơ̆ng ƀô̆ mta Ih ôh, kăn sua mă Yang Mngăt Jăk Ih mơ̆ng kâo rei.

¹² Lŏ bi wĭt kơ kâo klei hơ̆k mơak klei Ih bi mtlaih, leh anăn krơ̆ng kâo hŏng ai tiê čiăng ngă tui si Ih čiăng.

¹³ Hlăk anăn kâo srăng mtô êlan Ih kơ phung gao klei bhiăn, leh anăn phung soh srăng wĭt kơ Ih.

¹⁴ Ơ Aê Diê, Aê Diê pô bi mtlaih kâo, bi mtlaih kâo mơ̆ng klei soh tuh êrah, leh anăn êlah kâo srăng mmuñ kraih kơ klei kpă ênô Ih.

¹⁵ Ơ Khua Yang, pŏk ƀăng kƀông kâo, leh anăn ƀăng êgei kâo srăng hưn klei bi mni kơ Ih.

¹⁶ Kyuadah Ih amâo mơak ôh hŏng klei ngă yang; tơdah kâo myơr kơ Ih mnơ̆ng myơr čuh, mnơ̆ng anăn amâo bi mơak kơ Ih ôh.

¹⁷ Mnơ̆ng ngă yang bi mơak kơ Aê Diê jing ai mĭn mčah; Ơ Aê Diê, Ih amâo bi êmut ôh kơ ai tiê mčah leh anăn kmhal kơ klei soh.

¹⁸ Ngă jăk bĕ kơ ƀuôn Siôn hlăm klei Ih čiăng jăk; lŏ mdơ̆ng mnư̆ ƀuôn Yêrusalem.

¹⁹ Snăn Ih srăng mơak hŏng mnơ̆ng ngă yang kpă, hŏng mnơ̆ng myơr čuh leh anăn mnơ̆ng myơr čuh hgăl; snăn arăng srăng myơr êmô knô ti knưl ngă yang Ih.