Klei Mmuñ Hđăp 5 - Klei Aê Diê Blŭ 2015

Klei Wah Lač Čiăng kơ Yêhôwa Mgang

Kơ khua phung mmuñ: hŏng Nêhilôt. Klei mmuñ hđăp Y-Đawit.

¹ Ơ Yêhôwa, mđing knga kơ klei kâo blŭ, hmư̆ bĕ klei kâo krao.

² Ơ Mtao kâo leh anăn Aê Diê kâo, dôk hmư̆ asăp kâo ur; kyuadah kơ Ih yơh kâo wah lač.

³ Ơ Yêhôwa, êjai aguah Ih hmư̆ asăp kâo; êjai aguah kâo srăng wah lač kơ Ih leh anăn dôk kăp guôn.

⁴ Kyuadah amâo djŏ ôh Ih jing sa čô Aê Diê khăp kơ klei ƀai; pô jhat amâo dưi dôk mbĭt hŏng Ih ôh.

⁵ Mnuih mgao amâo dưi dôk dơ̆ng ti anăp ală Ih ôh; Ih bi êmut kơ jih jang phung ngă klei wê.

⁶ Ih bi rai hĕ phung luar; Yêhôwa bi êmut kheh kơ mnuih tuh êrah leh anăn ngă klei mplư.

⁷ Bi kâo, kyua klei khăp sĭt suôr Ih lu êdimi, kâo srăng mŭt hlăm sang Ih; kâo srăng kkuh mpŭ phă sang yang doh jăk Ih hŏng klei huĭ mpŭ.

⁸ Ơ Yêhôwa, atăt ba kâo hlăm klei kpă ênô Ih kyua phung roh kâo; ngă bi kpă êlan Ih ti anăp kâo.

⁹ Kyuadah amâo mâo klei sĭt hlăm ƀăng êgei diñu ôh; ai tiê diñu knŏng čiăng bi rai; đŏk diñu jing msat kuai leh, leh anăn êlah diñu blŭ klei myâo mă.

¹⁰ Ơ Aê Diê, bi kmhal bĕ diñu; brei klei diñu trông čhai bi lĕ diñu pô; suôt diñu kyua klei soh diñu lu snăk, kyuadah diñu bi kdơ̆ng leh hŏng Ih.

¹¹ Ƀiădah brei jih jang phung kđap hlăm Ih dôk mơak; brei diñu mmuñ hŏng klei hơ̆k nanao; leh anăn brei Ih mgang diñu, čiăng kơ phung khăp kơ anăn Ih dưi mâo klei hơ̆k mơak hlăm Ih.

¹² Kyuadah Ih brei klei jăk jĭn kơ pô kpă, Ơ Yêhôwa; klei pap Ih dôk jŭm dar ñu msĕ si khil.