Klei Mmuñ Hđăp 47 - Klei Aê Diê Blŭ 2015

Aê Diê Jing Mtao Lăn Ala

Kơ khua phung mmuñ. Klei mmuñ hđăp phung anak Y-Kôrê.

¹ Ơ jih jang phung ƀuôn sang, pah bĕ kngan diih! Ur driâo kơ Aê Diê hŏng klei mmuñ hơ̆k mơak!

² Kyuadah Yêhôwa, Pô Ti Dlông Hĭn, jing năng kơ arăng huĭ, Ñu jing Mtao prŏng kiă jih lăn ala.

³ Ñu bi mŭt phung ƀuôn sang ti gŭ hmei, Ñu dưm phung găp djuê mnuih ti gŭ jơ̆ng hmei.

⁴ Ñu ruah leh čar brei hmei dưn, jing anôk siam kơ phung Yakôp, phung Ñu khăp. (Sêla)

⁵ Aê Diê đĭ ti jhưng mtao hŏng klei ur driâo, Yêhôwa đĭ hŏng ênai asăp ki.

⁶ Mmuñ bi mni bĕ kơ Aê Diê, mmuñ bi mni bĕ! Mmuñ bi mni bĕ kơ Mtao drei, mmuñ bi mni bĕ!

⁷ Kyuadah Aê Diê jing Mtao kơ jih lăn ala; mmuñ bi mni bĕ hŏng klei mmuñ hđăp!

⁸ Aê Diê kiă kriê phung găp djuê mnuih, Aê Diê dôk gŭ ti jhưng mtao doh jăk Ñu.

⁹ Phung khua kiă kriê phung ƀuôn sang bi kƀĭn mđrăm mbĭt jing phung ƀuôn sang pioh kơ Aê Diê Y-Abraham. Kyuadah khil phung kahan bi blah jih lăn ala jing dŏ Aê Diê. Ñu mâo klei mpŭ ti dlông hĭn.