Klei Mmuñ Hđăp 43 - Klei Aê Diê Blŭ 2015

¹ Ơ Aê Diê, phat bĕ kđi kâo, leh anăn mgang kâo mơ̆ng phung ƀuôn sang amâo mpŭ kơ Aê Diê ôh; bi mtlaih kâo mơ̆ng phung mplư leh anăn soh jhat.

² Kyuadah Ih jing Aê Diê, Pô mgang kâo; si ngă Ih lui hĕ kâo lĕ? Si ngă kâo dôk kơŭ kyăm kyua pô roh ktư̆ juă?

³ Mơĭt bĕ klei mngač leh anăn klei sĭt nik Ih; brei diñu atăt kâo, brei diñu atăt kâo kơ čư̆ doh jăk Ih leh anăn kơ anôk Ih dôk.

⁴ Snăn kâo srăng nao kơ knưl Aê Diê, truh kơ Aê Diê, hlăm Ñu kâo mâo klei hơ̆k mơak; leh anăn kâo srăng bi mni kơ Ih hŏng đĭng brô̆, Ơ Aê Diê, Aê Diê kâo.

⁵ Si ngă ih êdu ai, Ơ mngăt kâo, leh anăn si ngă ih rŭng răng ti lam kâo? Čang hmăng bĕ kơ Aê Diê; kyuadah kâo ăt srăng lŏ bi mni kơ Ñu, pô bi mtlaih kâo leh anăn Aê Diê kâo.