Klei Mmuñ Hđăp 34 - Klei Aê Diê Blŭ 2015

Klei Bi Mni kơ Klei Jăk Yêhôwa

Klei mmuñ hđăp Y-Đawit hlăk ñu mplư ngă klei khŏ ti anăp Y-Abimêlek. Y-Abimêlek suôt ñu leh anăn ñu đuĕ.

¹ Kâo srăng mpŭ mni kơ Yêhôwa nanao nanao; ƀăng êgei kâo srăng bi mni kơ Ñu nanao.

² Mngăt kâo srăng bi mni kơ Ñu pô hlăm Yêhôwa; brei phung knap mñai hmư̆ klei anăn leh anăn hơ̆k mơak.

³ Ơ mpŭ mni bĕ kơ Yêhôwa mbĭt hŏng kâo, brei drei mđrăm mbĭt mpŭ mni kơ anăn Ñu.

⁴ Kâo duah leh Yêhôwa, leh anăn Ñu lŏ wĭt lač leh kơ kâo; Ñu bi mtlaih kâo leh mơ̆ng jih klei kâo huĭ.

⁵ Phung kăp dlăng kơ Ñu srăng mtrang mngač; ƀô̆ mta diñu amâo srăng hêñ ôh.

⁶ Sa čô knap mñai anei ur, Yêhôwa hmư̆ gơ̆, leh anăn bi mtlaih gơ̆ mơ̆ng jih jang klei knap mñai.

⁷ Dĭng buăl jăk Yêhôwa dôk jŭm dar phung huĭ mpŭ kơ Ñu, leh anăn bi mtlaih digơ̆.

⁸ Ơ, lông ksiêm leh anăn ƀuh kơ Yêhôwa jing jăk! Jăk mơak yơh mnuih đuĕ dăp hlăm Ñu.

⁹ Ơ diih phung doh jăk Ñu, huĭ mpŭ bĕ kơ Yêhôwa, kyuadah phung huĭ mpŭ kơ Ñu amâo kƀah mnơ̆ng ôh.

¹⁰ Êđai êmông gu thâo klei ư̆ leh anăn klei êpa; ƀiădah phung duah Yêhôwa amâo srăng kƀah sa mta klei jăk ôh.

¹¹ Hriê bĕ, Ơ phung anak kâo, dôk hmư̆ kâo; kâo srăng bi hriăm diih thâo huĭ mpŭ kơ Yêhôwa.

¹² Hlei mnuih khăp kơ klei hdĭp, čang hmăng dôk hdĭp sui thŭn čiăng ƀuh klei jăk mơak?

¹³ Răng bĕ, đăm brei ôh êlah ih blŭ klei jhat, leh anăn ƀăng kƀông ih blŭ klei luar.

¹⁴ Đuĕ bĕ mơ̆ng klei jhat, leh anăn ngă klei jăk; tui duah leh anăn tiŏ klei êđăp ênang.

¹⁵ Ală Yêhôwa dlăng kơ phung kpă, leh anăn knga Ñu kăp hmư̆ asăp digơ̆ ur.

¹⁶ Ƀô̆ mta Yêhôwa bi kdơ̆ng hŏng phung ƀai, čiăng đăm brei arăng lŏ hdơr kơ diñu ti lăn ala ôh.

¹⁷ Tơdah phung kpă ur kwưh klei đru, Yêhôwa hmư̆, leh anăn bi mtlaih digơ̆ mơ̆ng jih jang klei knap mñai.

¹⁸ Yêhôwa dôk giăm phung mâo ai tiê mčah, leh anăn bi mtlaih phung mâo mngăt ênguôt.

¹⁹ Pô kpă mâo lu klei knap mñai; ƀiădah Yêhôwa bi mtlaih gơ̆ mơ̆ng jih jang klei anăn.

²⁰ Yêhôwa mgang jih jang klang gơ̆; amâo mâo sa ƀĕ srăng joh ôh.

²¹ Klei măk ƀai srăng bi mdjiê pô ƀai; leh anăn phung bi êmut kơ pô kpă srăng tŭ klei bi kmhal.

²² Yêhôwa bi tui mngăt phung dĭng buăl Ñu; amâo mâo sa čô đuĕ dăp hlăm Ñu srăng tŭ klei bi kmhal.