Klei Mmuñ Hđăp 3 - Klei Aê Diê Blŭ 2015

Klei Wah Lač Aguah Čiăng Yêhôwa Đru

Klei mmuñ hđăp Y-Đawit, hlăk ñu đuĕ mơ̆ng anak ñu Y-Apsalôm.

¹ Ơ Yêhôwa, phung roh kâo jing lu êdi! Phung kgŭ bi kdơ̆ng hŏng kâo jing lu snăk.

² Lu mnuih lač djŏ kơ kâo, “Aê Diê amâo srăng bi mtlaih ñu ôh.” (Sêla)

³ Ƀiădah Ih, Ơ Yêhôwa, jing khil kâo; Ih jing klei guh kơang kâo, leh anăn Pô brei kâo kngưr boh kŏ.

⁴ Hŏng asăp kâo, kâo ur kraih kơ Yêhôwa, Ñu lŏ wĭt lač kơ kâo mơ̆ng čư̆ doh jăk Ñu. (Sêla)

⁵ Kâo đih leh anăn pĭt; kâo mdih, kyuadah Yêhôwa răng kriê kâo.

⁶ Kâo amâo huĭ ôh kơ lu êbâo mnuih dôk jŭm dar kăp ngă kơ kâo.

⁷ Kgŭ bĕ Ih, Ơ Yêhôwa! Bi mtlaih kâo bĕ, Ơ Aê Diê kâo! Čăm bĕ ti miêng jih jang phung roh kâo; bi joh bĕ êgei phung ƀai.

⁸ Klei bi mtlaih jing dŏ Yêhôwa dê; brei Ih brei klei jăk jĭn kơ phung ƀuôn sang Ih. (Sêla)