Klei Mmuñ Hđăp 24 - Klei Aê Diê Blŭ 2015

Mtao Prŏng Hĭn

Klei mmuñ hđăp Y-Đawit.

¹ Boh lăn leh anăn jih jang mnơ̆ng hlăm ñu jing dŏ Yêhôwa; lăn ala leh anăn phung mnuih dôk hlăm ñu jing dŏ Ñu mơh.

² Kyuadah Yêhôwa mdơ̆ng lăn thu ti dlông êa ksĭ, leh anăn bi kjăp ñu ti dlông êa êlam.

³ Hlei dưi đĭ ti čư̆ Yêhôwa? Leh anăn hlei dưi dôk dơ̆ng hlăm anôk doh jăk Ñu?

⁴ Pô mâo kngan leh anăn ai tiê doh, pô amâo jao mngăt ñu kơ klei luar ôh, leh anăn amâo kat ôh asei čiăng mplư.

⁵ Ñu srăng mâo klei jăk jĭn mơ̆ng Yêhôwa, leh anăn klei kpă ênô mơ̆ng Aê Diê Pô bi mtlaih ñu.

⁶ Snăn yơh jing phung găp djuê mnuih duah ñu, phung duah ƀô̆ mta Ih, Ơ Aê Diê Y-Yakôp. (Sêla)

⁷ Pŏk bĕ, Ơ jih jang ƀăng jang; pŏk bĕ, jih jang ƀăng jang dôk hlŏng lar, čiăng kơ Mtao klei guh kơang dưi mŭt.

⁸ Hlei jing Mtao klei guh kơang? Yêhôwa, Pô ktang, Pô myang, Yêhôwa, ktang hlăm klei bi blah!

⁹ Pŏk bĕ, Ơ jih jang ƀăng jang; pŏk bĕ, jih jang ƀăng jang dôk hlŏng lar, čiăng kơ Mtao klei guh kơang dưi mŭt.

¹⁰ Hlei Ñu jing, Mtao klei guh kơang anăn? Yêhôwa kơ phung kahan, Ñu yơh pô jing Mtao klei guh kơang. (Sêla)