Klei Mmuñ Hđăp 22 - Klei Aê Diê Blŭ 2015

Asăp Krao leh anăn Klei Mmuñ Bi Mni

Kơ khua phung mmuñ: djŏ kơ đŏk Ajêlet Has-Sahar. Klei mmuñ hđăp Y-Đawit.

¹ Ơ Aê Diê kâo, Ơ Aê Diê kâo, si ngă Ih lui kâo leh? Si ngă Ih dôk kbưi amâo đru kâo, leh anăn amâo dôk hmư̆ klei kâo krao ôh?

² Ơ Aê Diê kâo, kâo ur krao êjai hruê, ƀiădah Ih amâo lŏ wĭt lač ôh; wăt êjai mlam, ƀiădah kăn mâo klei mdei rei.

³ Ƀiădah Ih jing Pô Doh Jăk, kiă kriê ti jhưng mtao Ih, jing Pô phung Israel mpŭ bi mni.

⁴ Phung aê hmei knang leh kơ Ih; diñu knang leh, leh anăn Ih bi mtlaih diñu leh.

⁵ Diñu ur krao kơ Ih, leh anăn Ih bi mtlaih diñu leh; diñu knang kơ Ih leh, leh anăn Ih amâo bi hêñ diñu ôh.

⁶ Ƀiădah kâo jing sa drei hluăt, leh anăn amâo djŏ sa čô mnuih ôh; kâo jing pô phung mnuih bi hêñ, leh anăn pô phung ƀuôn sang bi êmut.

⁷ Jih jang hlei pô ƀuh kâo tlao mưč kơ kâo, diñu wiâo ƀăng kƀông leh anăn kteh kŏ asei, lač:

⁸ “Ñu knang leh kơ Yêhôwa, brei Yêhôwa bi mtlaih ñu, brei Yêhôwa dŏng ñu, kyuadah Yêhôwa khăp kơ ñu!”

⁹ Ƀiădah Ih pô bi kbiă leh kâo mơ̆ng tian amĭ; Ih brei kâo knang kơ Ih êjai kâo đih ti đah da amĭ kâo.

¹⁰ Kâo knang kơ Ih leh mơ̆ng tian amĭ kâo, Ih jing Aê Diê kâo leh dơ̆ng mơ̆ng amĭ kkiêng kơ kâo.

¹¹ Đăm dôk kbưi mơ̆ng kâo ôh, kyuadah klei rŭng răng giăm truh, leh anăn amâo mâo pô đru kâo ôh.

¹² Mâo lu êmô knô dôk jŭm kâo, lu êmô knô ktang mơ̆ng čar Basan dôk wang kâo.

¹³ Diñu ha ƀăng êgei diñu kơ kâo, msĕ si êmông gu čiăng hiêk ƀơ̆ng leh anăn gruh.

¹⁴ Kâo jing msĕ si êa arăng tuh leh, leh anăn jih jang klang kâo amâo lŏ bi kkuh ôh; tiê boh kâo msĕ si hlĭn, ñu lik hlăm prôč tiê kâo.

¹⁵ Klei ktang kâo thu msĕ si lăn čeh mčah, êlah kâo đuôm hŏng hưl kâo, Ih brei kâo đih ti ƀruih lăn msĕ si djiê.

¹⁶ Kyuadah lu asâo dôk jŭm kâo; sa phung ngă jhat wang kâo leh; diñu tlŏ leh kngan leh anăn jơ̆ng kâo.

¹⁷ Kâo dưi yap jih jang klang kâo; phung roh kâo ktan ală leh anăn mưč kơ kâo.

¹⁸ Diñu bi mbha čhiăm ao kâo hdơ̆ng diñu, leh anăn diñu ngă klei mđăo kơ ao jhung kâo.

¹⁹ Ƀiădah đăm dôk kbưi ôh mơ̆ng kâo, Ơ Yêhôwa! Ih jing pô đru kâo, hriê dŏng kâo djăl!

²⁰ Bi mtlaih mngăt kâo mơ̆ng đao gưm, klei hdĭp kâo mơ̆ng phung asâo!

²¹ Bi mtlaih kâo mơ̆ng ƀăng êgei êmông gu, dŏng kâo mơ̆ng ki kbao dliê! Ih wĭt lač leh klei kâo akâo!

²² Kâo srăng hưn anăn Ih kơ phung amai adei kâo, kâo srăng bi mni kơ Ih ti krah phung bi kƀĭn.

²³ Ơ diih, phung huĭ mpŭ kơ Yêhôwa, bi mni kơ Ñu bĕ! Ơ jih jang diih, phung anak čô Y-Yakôp, brei klei guh kơang kơ Ñu, ktư̆ yơ̆ng bĕ ti anăp Ñu, Ơ jih jang phung Israel!

²⁴ Kyuadah Ñu amâo tuôm bi êmut, amâodah hngah amâo đru ôh kơ klei dleh pô knap mñai; kăn Ñu mdăp ƀô̆ Ñu kơ kâo rei, ƀiădah Ñu hmư̆ leh tơdah kâo ur kơ Ñu.

²⁵ Hlăm klei bi kƀĭn prŏng arăng srăng bi mni kơ kâo kyua klei Ih ngă leh; kâo srăng bi sĭt klei kâo ƀuăn ti anăp phung huĭ mpŭ kơ ñu.

²⁶ Phung ƀun ƀin srăng ƀơ̆ng huă leh anăn trei; phung duah Yêhôwa srăng bi mni kơ Ñu! Brei ai tiê diih dôk hdĭp nanao hlŏng lar!

²⁷ Jih jang knhal lăn ala srăng hdơr leh anăn wĭt kơ Yêhôwa; jih jang găp djuê mnuih srăng buôn kkuh ti anăp Ñu.

²⁸ Kyuadah ƀuôn ala mtao jing dŏ Yêhôwa, Ñu kiă kriê phung găp djuê mnuih.

²⁹ Ơ, jih jang phung mdrŏng ti lăn ala srăng huă mnăm buôn kkuh kơ Ñu; jih jang phung wĭt kơ ƀruih lăn srăng buôn kkuh ti anăp Ñu, jih jang phung amâo dưi pioh klei hdĭp digơ̆ ôh.

³⁰ Phung ênuk êdei srăng mă bruă kơ Ñu; arăng srăng yăl dliê klei Yêhôwa kơ găp djuê ênuk êdei.

³¹ Diñu srăng hưn klei kpă ênô Ñu kơ phung ƀuôn sang arăng ka kkiêng ôh, “Yêhôwa ngă leh klei anăn.”