Klei Mmuñ Hđăp 21 - Klei Aê Diê Blŭ 2015

Klei Bi Mni Kyua Klei Dưi

Kơ khua phung mmuñ. Klei mmuñ hđăp Y-Đawit.

¹ Ơ Yêhôwa, mtao mâo klei hơ̆k mơak hlăm klei ktang Ih; leh anăn ñu mơak êdimima hlăm klei Ih đru!

² Ih brei leh kơ ñu klei ai tiê ñu čiăng, leh anăn Ih amâo hngah ôh ya klei ƀăng êgei ñu akâo leh. (Sêla)

³ Kyuadah hŏng klei jăk jĭn Ih nao bi tuôm hŏng ñu; Ih mđua leh ti boh kŏ ñu sa boh đuôn mtao mah doh.

⁴ Ñu akâo kơ Ih klei hdĭp; Ih brei leh kơ ñu klei hdĭp jŏk leh anăn dôk hlŏng lar.

⁵ Klei guh kơang ñu prŏng jing kyua klei Ih đru; Ih brei kơ ñu klei mpŭ leh anăn klei kdrăm.

⁶ Sĭt nik Ih brei ñu jing pô mâo klei jăk jĭn hlŏng lar; Ih bi bŏ ñu hŏng klei hơ̆k hŏng klei Ih dôk mbĭt.

⁷ Kyuadah mtao knang kơ Yêhôwa; leh anăn hŏng klei Pô Ti Dlông Hĭn khăp sĭt suôr, ñu amâo srăng mgei ôh.

⁸ Kngan ih srăng ngă kơ jih phung roh ih; kngan hnuă ih srăng mă phung bi êmut kơ ih.

⁹ Ih srăng ngă kơ diñu msĕ si kpur hlơr ti hruê ih srăng bi êdah. Ih srăng lun phung anăn hlăm klei Ih ngêñ; leh anăn pui srăng ƀơ̆ng diñu.

¹⁰ Ih srăng bi luč phung anak čô diñu mơ̆ng lăn ala, leh anăn djuê diñu mơ̆ng krah phung anak mnuih.

¹¹ Tơdah diñu čiăng ngă jhat kơ Ih, tơdah diñu mĭn ngă klei ƀai, diñu amâo srăng dưi ôh.

¹² Kyuadah Ih srăng kliêng hna Ih phă diñu; snăn diñu đuĕ.

¹³ Ơ Yêhôwa, brei Ih mâo klei mpŭ hlăm klei ktang Ih! Hmei srăng mmuñ bi mni kơ klei myang Ih.