Klei Mmuñ Hđăp 146 - Klei Aê Diê Blŭ 2015

Yêhôwa Jing Pô Đru Lu Êdimi

¹ Bi mni kơ Yêhôwa; Ơ mngăt kâo, bi mni bĕ kơ Yêhôwa!

² Kâo srăng bi mni kơ Yêhôwa jih hruê kâo dôk hdĭp; kâo srăng mmuñ bi mni kơ Aê Diê kâo êjai kâo dôk hdĭp.

³ Đăm knang kơ phung khua kiă kriê ôh, phung mnuih thâo djiê, phung amâo dưi đru ôh.

⁴ Tơdah êwa diñu tuč, diñu wĭt kơ ƀruih lăn; ti hruê anăn hdră diñu čiăng ngă rai luč jih.

⁵ Jăk mơak yơh pô mâo Aê Diê Y-Yakôp đru, pô čang hmăng hlăm Yêhôwa Aê Diê ñu,

⁶ Pô hrih adiê leh anăn lăn ala, êa ksĭ leh anăn jih jang mnơ̆ng hlăm diñu, Yêhôwa, Pô dôk sĭt suôr hlŏng lar.

⁷ Ñu ngă klei djŏ kơ phung arăng ktư̆ juă, leh anăn brei mnơ̆ng ƀơ̆ng huă kơ phung êpa. Yêhôwa bi êngiê phung mnă.

⁸ Yêhôwa mblang ală phung bum, Yêhôwa lŏ bi kơrŭ phung gô leh. Yêhôwa khăp kơ phung kpă ênô.

⁹ Yêhôwa kiă kriê phung tue, Ñu krơ̆ng phung anak êrĭt leh anăn mniê djiê ung, ƀiădah Ñu bi rai êlan phung ƀai.

¹⁰ Yêhôwa srăng kiă kriê hlŏng lar, Aê Diê ih, Ơ ƀuôn Siôn, kiă kriê hlăm jih jang ênuk. Bi mni bĕ kơ Yêhôwa!