Klei Mmuñ Hđăp 143 - Klei Aê Diê Blŭ 2015

Klei Wah Lač Akâo Klei Đru

Klei mmuñ hđăp Y-Đawit.

¹ Ơ Yêhôwa, hmư̆ bĕ klei kâo wah lač, hlăm klei kpă ênô Ih mđing bĕ knga kơ klei kâo kwưh. Lŏ wĭt lač kơ kâo hlăm klei sĭt suôr Ih.

² Đăm phat kđi kơ dĭng buăl Ih ôh, kyuadah amâo mâo sa čô mnuih hdĭp jing kpă ênô ti anăp Ih.

³ Pô roh tiŏ mngăt kâo, ñu juă klei hdĭp kâo ti lăn. Ñu brei kâo dôk hlăm klei mmăt, msĕ si phung djiê leh mơ̆ng sui.

⁴ Kyuanăn mngăt kâo êdu snăk; ai tiê kâo rŭng răng.

⁵ Kâo hdơr kơ hruê êgao leh; kâo dôk mĭn kơ jih jang bruă Ih ngă leh, kâo ksiêm bruă kngan Ih.

⁶ Kâo yơr kngan kâo phă Ih; mngăt kâo mhao kơ Ih msĕ si lăn thu. (Sêla)

⁷ Brei Ih ruăt lŏ wĭt lač kơ kâo, Ơ Yêhôwa; mngăt kâo êdu ai leh. Đăm mdăp ƀô̆ Ih kơ kâo ôh, huĭdah kâo jing msĕ si phung trŭn kơ Ƀăng Êlam.

⁸ Ti aguah ưm brei kâo hmư̆ klei khăp Ih; kyuadah kâo knang kơ Ih; bi hriăm kâo thâo êlan kâo srăng êbat, kyuadah kâo mđĭ mngăt kâo phă Ih.

⁹ Ơ Yêhôwa, bi mtlaih kâo mơ̆ng phung roh kâo; kâo êran nao kơ Ih čiăng đuĕ dăp.

¹⁰ Bi hriăm kâo ngă klei Ih čiăng, kyuadah Ih jing Aê Diê kâo. Brei mngăt myang Ih atăt ba kâo hlăm êlan dap.

¹¹ Kyua anăn Ih, Ơ Yêhôwa, mgang klei hdĭp kâo; hlăm klei kpă ênô Ih, bi mtlaih mngăt kâo mơ̆ng klei rŭng răng.

¹² Hlăm klei khăp Ih, bi luč hĕ phung roh kâo; leh anăn bi rai jih jang phung bi kdơ̆ng hŏng kâo, kyuadah kâo jing dĭng buăl Ih.