Klei Mmuñ Hđăp 135 - Klei Aê Diê Blŭ 2015

Klei Mmuñ Bi Mni kơ Bruă Yuôm Bhăn Yêhôwa. – Rup Yang Jing Hơăi Mang

¹ Bi mni bĕ kơ Yêhôwa. Bi mni bĕ kơ anăn Yêhôwa; Bi mni bĕ kơ Ñu, Ơ phung diih dĭng buăl Yêhôwa,

² diih phung dôk hlăm sang Yêhôwa, hlăm wăl sang Aê Diê drei.

³ Bi mni bĕ kơ Yêhôwa, kyuadah Yêhôwa jing Pô jăk; mmuñ bi mni kơ anăn Ñu, kyuadah Ñu thâo pap.

⁴ Kyuadah Yêhôwa ruah leh phung Yakôp kơ Ñu pô, čiăng kơ phung Israel jing ngăn dưn Ñu.

⁵ Kyuadah kâo thâo kơ Yêhôwa jing prŏng, leh anăn Khua Yang drei jing prŏng hĭn kơ jih jang yang.

⁶ Yêhôwa ngă jih klei Ñu čiăng hlăm adiê, hlăm lăn ala, hlăm êa ksĭ, leh anăn hlăm jih jang anôk êlam.

⁷ Ñu yơh brei knam đĭ mơ̆ng knhal lăn ala; Ñu brei kmlă leh anăn hjan, leh anăn brei angĭn kbiă mơ̆ng anôk Ñu pioh.

⁸ Ñu yơh čăm bi mdjiê phung anak êkei kkiêng tal êlâo hlăm čar Êjip, wăt mnuih leh anăn hlô mnơ̆ng.

⁹ Ñu bi êdah klei bi knăl leh anăn klei yuôm bhăn ti krah ih, Ơ čar Êjip, ngă kơ mtao Pharaôn leh anăn kơ jih jang phung dĭng buăl ñu.

¹⁰ Ñu čăm leh lu phung găp djuê, leh anăn Ñu bi mdjiê phung mtao jhŏng ktang:

¹¹ Y-Sihôn mtao phung Amôrit, Y-Ôk mtao phung Basan, leh anăn jih jang mtao čar Kanaan,

¹² leh anăn Ñu jao čar digơ̆ jing ngăn dưn kơ phung ƀuôn sang Ñu Israel.

¹³ Ơ Yêhôwa, anăn Ih dôk hlŏng lar, Ơ Yêhôwa, klei hing ang Ih dôk hlăm jih jang ênuk.

¹⁴ Kyuadah Yêhôwa srăng phat kđi kpă phung ƀuôn sang Ñu, leh anăn pap kơ phung dĭng buăl Ñu.

¹⁵ Rup yang phung tue ngă hŏng prăk leh anăn mah, jing bruă kngan mnuih ngă.

¹⁶ Digơ̆ mâo ƀăng êgei, ƀiădah amâo thâo blŭ ôh, mâo ală, ƀiădah amâo thâo ƀuh ôh,

¹⁷ mâo knga, ƀiădah amâo thâo hmư̆ ôh, digơ̆ kăn mâo rei êwa hlăm ƀăng êgei.

¹⁸ Phung ngă digơ̆ jing msĕ si digơ̆, sĭt yơh jih jang phung knang kơ digơ̆ jing msĕ snăn.

¹⁹ Ơ sang Israel, hơêč mpŭ mni bĕ kơ Yêhôwa, Ơ sang Y-Arôn, mpŭ mni bĕ kơ Yêhôwa,

²⁰ Ơ sang Y-Lêwi, mpŭ mni bĕ kơ Yêhôwa, Ơ diih phung huĭ mpŭ kơ Yêhôwa, mpŭ mni bĕ kơ Yêhôwa.

²¹ Mpŭ mni bĕ kơ Yêhôwa mơ̆ng ƀuôn Siôn, kơ Pô dôk ti ƀuôn Yêrusalem. Bi mni kơ Yêhôwa.