Klei Mmuñ Hđăp 130 - Klei Aê Diê Blŭ 2015

Klei Wah Lač Akâo Klei Đru

Klei phung hiu nao kơ ƀuôn doh jăk mmuñ.

¹ Mơ̆ng anôk êlam kâo ur krao kơ Ih, Ơ Yêhôwa.

² Ơ Khua Yang, hmư̆ bĕ asăp kâo; mđing knga Ih kơ asăp kâo kwưh.

³ Ơ Yêhôwa, tơdah Ih hdơr pioh klei wê, Ơ Khua Yang, hlei pô dưi tlaih?

⁴ Ƀiădah Ih thâo pap brei, kyuanăn arăng huĭ mpŭ kơ Ih.

⁵ Kâo čang guôn kơ Yêhôwa, mngăt kâo čang guôn yơh; leh anăn kâo čang hmăng hlăm klei Ñu blŭ.

⁶ Mngăt kâo čang guôn kơ Yêhôwa lu hĭn kơ phung gak guôn tơl aguah; sĭt nik lu hĭn kơ phung gak guôn tơl aguah.

⁷ Ơ Phung Israel, čang hmăng bĕ kơ Yêhôwa; kyuadah Yêhôwa bŏ hŏng klei jăk, leh anăn mâo klei myang êbeh dlai dưi bi tui.

⁸ Ñu yơh srăng bi tui phung Israel mơ̆ng jih klei wê digơ̆.