Klei Mmuñ Hđăp 12 - Klei Aê Diê Blŭ 2015

Klei Wah Lač Akâo kơ Yêhôwa Đru

Kơ khua phung mmuñ: djŏ kơ đŏk Sêminit. Klei mmuñ hđăp Y-Đawit.

¹ Ơ Yêhôwa, đru bĕ, kyuadah amâo lŏ mâo ôh phung mnuih kpă ênô; amâo lŏ mâo phung sĭt suôr ôh ti krah phung anak mnuih.

² Grăp čô blŭ klei luar hdơ̆ng diñu; hŏng ƀăng kƀông diñu blŭ klei myâo mă, ai tiê diñu mĭn dua mta klei.

³ Akâo kơ Yêhôwa bi rai jih jang ƀăng kƀông blŭ klei myâo mă, leh anăn êlah blŭ klei mgao.

⁴ Diñu lač snei, “Hmei srăng dưi kyua hŏng êlah hmei; hmei mâo leh ƀăng kƀông; hlei pô srăng jing khua hmei?”

⁵ “Kyuadah arăng ktư̆ juă phung ƀun ƀin, leh anăn phung knap mñai krao,” Yêhôwa lač, “Ară anei Kâo srăng kgŭ; Kâo srăng brei ñu dôk êđăp ênang tui si ñu kwưh.”

⁶ Klei Yêhôwa ƀuăn jing klei ƀuăn doh; msĕ si prăk arăng bi doh hlăm pui êdai, bi doh leh kjuh blư̆.

⁷ Ơ Yêhôwa, brei Ih kiă kriê diñu, mgang diñu mơ̆ng phung ênuk anei nanao hlŏng lar.

⁸ Phung ƀai hiu tar ƀar, êjai phung mnuih mpŭ kơ klei soh.