Klei Mmuñ Hđăp 118 - Klei Aê Diê Blŭ 2015

Klei Bi Mni Kyua Yêhôwa Brei Klei Dưi

¹ Bi mni bĕ kơ Yêhôwa, kyuadah Ñu jing jăk; klei khăp Ñu dôk nanao hlŏng lar.

² Brei phung Israel lač, “Klei khăp Ñu dôk nanao hlŏng lar.”

³ Brei sang Y-Arôn lač, “Klei khăp Ñu dôk nanao hlŏng lar.”

⁴ Brei phung huĭ mpŭ kơ Yêhôwa lač, “Klei khăp Ñu dôk nanao hlŏng lar.”

⁵ Ti krah klei knap mñai, kâo iêô wah lač kơ Yêhôwa; Yêhôwa lŏ wĭt lač kơ kâo leh anăn bi êngiê kâo.

⁶ Yêhôwa dôk tĭng kâo; kâo amâo srăng huĭ ôh. Ya mnuih dưi ngă kơ kâo?

⁷ Yêhôwa dôk tĭng kâo čiăng đru kâo; kâo srăng ƀuh klei dưi hŏng phung bi êmut kơ kâo.

⁸ Jăk hĭn đuĕ dăp hlăm Yêhôwa hŏng knang kơ mnuih.

⁹ Jăk hĭn đuĕ dăp hlăm Yêhôwa hŏng knang kơ phung khua kiă kriê.

¹⁰ Jih jang găp djuê mnuih wang kâo; hlăm anăn Yêhôwa kâo bi rai hĕ diñu leh.

¹¹ Diñu wang kâo, diñu dôk jŭm gah găn kâo; hlăm anăn Yêhôwa kâo bi rai hĕ diñu leh.

¹² Diñu dôk jŭm kâo msĕ si ana hnuê, diñu ram msĕ si pui ƀơ̆ng leh êruê; hlăm anăn Yêhôwa kâo bi rai hĕ diñu leh.

¹³ Arăng klư̆ čiăng bi êbuh kâo, ƀiădah Yêhôwa đru kâo leh.

¹⁴ Yêhôwa jing klei ktang kâo leh anăn klei mmuñ kâo; Ñu jing pô bi mtlaih kâo.

¹⁵ Asăp klei hơ̆k mơak klei bi mtlaih arăng hmư̆ hlăm sang čhiăm phung kpă ênô, kngan hnuă Yêhôwa ngă leh hŏng klei myang.

¹⁶ Kngan hnuă Yêhôwa dưi leh; kngan hnuă Yêhôwa ngă leh hŏng klei myang.

¹⁷ Kâo amâo srăng djiê ôh ƀiădah srăng dôk hdĭp, leh anăn hưn bruă Yêhôwa ngă leh.

¹⁸ Yêhôwa čăm mkra kâo ktang leh, ƀiădah Ñu amâo jao kâo kơ klei djiê ôh.

¹⁹ Pŏk brei kơ kâo ƀăng jang klei kpă ênô, čiăng kơ kâo dưi mŭt leh anăn bi mni kơ Yêhôwa.

²⁰ Nĕ anei ƀăng jang Yêhôwa; phung kpă ênô srăng mŭt tinăn.

²¹ Kâo bi mni kơ Ih kyuadah Ih lŏ wĭt lač leh kơ kâo; leh anăn Ih jing leh Pô bi mtlaih kâo.

²² Boh tâo phung mdơ̆ng sang hwiê hĕ leh, jing hĕ leh boh tâo phŭn ti kiêng.

²³ Yêhôwa yơh ngă bruă anei, jing bruă yuôm bhăn ti anăp ală drei.

²⁴ Nĕ anei hruê Yêhôwa mjing leh; brei drei hơ̆k leh anăn mơak yơh hruê anei.

²⁵ Ơ Yêhôwa, bi mtlaih hmei bĕ; Ơ Yêhôwa, brei hmei mâo klei dưi.

²⁶ Jăk mơak yơh kơ Pô hriê hlăm anăn Yêhôwa; mơ̆ng sang Yêhôwa hmei mpŭ mni kơ Ih.

²⁷ Yêhôwa jing Aê Diê, Ñu brei leh kơ hmei klei mngač. Hŏng klei hơ̆k mơak êbat bĕ truh ti knưl êjai djă adhan kyâo.

²⁸ Ih jing Aê Diê kâo, leh anăn kâo srăng bi mni kơ Ih; Ih jing Aê Diê kâo, kâo srăng mpŭ kơ Ih.

²⁹ Bi mni bĕ kơ Yêhôwa, kyuadah Ñu jing jăk; kyuadah klei khăp Ñu dôk nanao hlŏng lar.