Klei Mmuñ Hđăp 108 - Klei Aê Diê Blŭ 2015

Klei Wah Lač Akâo Klei Đru Dŏng Mơ̆ng Phung Roh

Klei mmuñ, Klei mmuñ hđăp Y-Đawit.

¹ Ai tiê kâo kjăp leh, Ơ Aê Diê, kâo srăng mmuñ, bi mni hŏng jih ai tiê.

² Mdih bĕ Ih, Ơ đĭng kliă leh anăn brô̆! Kâo srăng bi mdih klei mngač ang dar.

³ Kâo srăng bi mni kơ Ih ti krah phung ƀuôn sang, Ơ Yêhôwa; Kâo srăng mmuñ bi mni kơ Ih ti krah phung găp djuê mnuih.

⁴ Kyuadah klei khăp ih jing prŏng, dlông hĭn kơ phung adiê; leh anăn klei sĭt suôr Ih đĭ truh ti biut knam.

⁵ Ơ Aê Diê, brei Ih mâo klei guh kơang ti dlông phung adiê, brei klei guh kơang Ih dôk ti dlông jih lăn ala,

⁶ đru kâo hŏng kngan hnuă Ih, leh anăn lŏ wĭt lač kơ kâo čiăng kơ phung Ih khăp mâo klei bi mtlaih.

⁷ Aê Diê blŭ leh hlăm adŭ doh jăk Ñu: “Hŏng klei dưi Kâo srăng bi mbha ƀuôn Sičem, leh anăn mkă bi mbha tlung Sukôt.

⁸ Čar Galaat jing dŏ Kâo, Manasê jing dŏ Kâo; Êphraim jing mnơ̆ng mgang kơ boh kŏ Kâo, Yuđa jing giê mtao Kâo.

⁹ Čar Môap jing hmăm êa anôk Kâo mnei, ti čar Êđôm Kâo hwiê hdruôm jơ̆ng Kâo; Kâo srăng ur driâo kơ čar Philistin hŏng klei dưi.”

¹⁰ Hlei pô srăng atăt kâo kơ ƀuôn mâo kđông? Hlei pô srăng atăt kâo truh ti čar Êđôm?

¹¹ Amâo djŏ hĕ Ih, Ơ Aê Diê, Pô hngah leh kơ hmei, leh anăn amâo lŏ nao ôh mbĭt hŏng phung kahan hmei?

¹² Hriê đru hmei ngă kơ phung roh, kyuadah klei mnuih đru amâo yuôm ôh.

¹³ Hŏng Aê Diê drei srăng mâo klei dưi, Ñu yơh srăng juă lin phung roh drei.