Klei Mmuñ Hđăp 107 - Klei Aê Diê Blŭ 2015

TRĂN TAL ÊMA Klei Bi Mni kơ Klei Jăk Yêhôwa

¹ Bi mni bĕ kơ Yêhôwa, kyuadah Ñu jing jăk; kyuadah klei khăp Ñu dôk nanao hlŏng lar.

² Brei phung Yêhôwa bi tui leh lač snăn, phung Ñu bi mtlaih leh mơ̆ng kngan phung roh,

³ phung Ñu bi kƀĭn leh mơ̆ng jih jang čar, mơ̆ng ngŏ, mơ̆ng yŭ, mơ̆ng dưr leh anăn mơ̆ng dhŭng, lač snăn mơh.

⁴ Đa đa diñu hiu rưng hlăm kdrăn tač, amâo ƀuh êlan dưi nao dôk ôh hlăm sa boh ƀuôn.

⁵ Diñu êpa leh anăn mhao, mngăt diñu djiê hwăt.

⁶ Hlăk anăn, hlăm klei knap mñai diñu ur krao kơ Yêhôwa, leh anăn Gơ̆ bi mtlaih diñu mơ̆ng klei rŭng răng.

⁷ Gơ̆ atăt diñu ti êlan kpă, tơl diñu truh kơ sa boh ƀuôn diñu dưi dôk.

⁸ Brei phung anăn bi mni kơ Yêhôwa kyua klei khăp Ñu, kyua bruă yuôm bhăn Ñu ngă leh kơ phung anak mnuih!

⁹ Kyuadah Ñu bi hrăp pô mhao, Ñu bi trei pô êpa hŏng mnơ̆ng jăk.

¹⁰ Đa đa dôk gŭ hlăm klei mmăt leh anăn hlăm êyui klei djiê, jing mnă knap mñai kă leh hŏng klei săng đai msei,

¹¹ kyuadah diñu bi kdơ̆ng leh hŏng klei Aê Diê blŭ, leh anăn bi êmut klei Pô Ti Dlông Hĭn kčĕ.

¹² Kyuanăn Aê Diê bi mčah ai tiê diñu hŏng klei mă bruă suăi, diñu êbuh leh anăn amâo mâo pô đru diñu ôh.

¹³ Hlăm klei knap mñai diñu ur krao kơ Yêhôwa, leh anăn Gơ̆ bi mtlaih diñu mơ̆ng klei rŭng răng.

¹⁴ Gơ̆ atăt diñu kbiă mơ̆ng klei mmăt leh anăn êyui klei djiê, leh anăn bi tloh klei săng đai diñu.

¹⁵ Brei diñu bi mni kơ Yêhôwa kyua klei khăp Ñu, kyua bruă yuôm bhăn Ñu ngă leh kơ phung anak mnuih!

¹⁶ Kyuadah Ñu bi mčah ƀăng jang kông, leh anăn bi joh giê kal msei.

¹⁷ Đa đa jing mluk kyua klei soh diñu ngă, leh anăn diñu tŭ klei knap mñai kyua klei wê diñu.

¹⁸ Diñu bi êmut snăk kơ jih jang mnơ̆ng ƀơ̆ng huă, leh anăn diñu nao giăm ƀăng jang klei djiê.

¹⁹ Hlăk anăn diñu ur krao kơ Yêhôwa kyua klei knap mñai diñu, leh anăn Yêhôwa bi mtlaih diñu mơ̆ng klei rŭng răng.

²⁰ Ñu mơĭt klei Ñu blŭ, leh anăn bi hlao diñu, leh anăn bi mtlaih diñu mơ̆ng msat.

²¹ Brei diñu bi mni kơ Yêhôwa kyua klei khăp Ñu, kyua bruă yuôm bhăn Ñu ngă leh kơ phung anak mnuih!

²² Brei digơ̆ myơr mnơ̆ng ngă yang klei bi mni, leh anăn yăl dliê bruă Ñu hŏng klei mmuñ hơ̆k.

²³ Đa đa phung trŭn nao kơ êa ksĭ đĭ kŭmpăn, leh anăn duah mnơ̆ng hŏng bruă ti êa ksĭ.

²⁴ Phung anăn ƀuh bruă Yêhôwa, leh anăn klei yuôm bhăn Ñu ngă ti krah êa êlam.

²⁵ Ñu mtă leh anăn bi truh angĭn êbŭ, brei êa ksĭ poh yă.

²⁶ Kŭmpăn diñu đĭ phă adiê, lŏ trŭn kơ ƀăng êlam; diñu êdu ai kyua klei rŭng răng mơ̆ng êa ksĭ.

²⁷ Diñu êbat ting ring rang msĕ si sa čô mnuih kpiê ruă, leh anăn amâo lŏ thâo ngă ôh.

²⁸ Hlăk anăn, hlăm klei knap mñai digơ̆ ur krao kơ Yêhôwa, leh anăn Ñu bi mtlaih diñu mơ̆ng klei rŭng răng.

²⁹ Ñu kơ̆ng angĭn êbŭ brei dôk kriêp, leh anăn êa poh yă dôk ngơ ngĭn.

³⁰ Diñu mơak kyuadah mâo klei êđăp ênang leh, leh anăn Ñu atăt diñu kơ ƀuôn diñu čiăng.

³¹ Brei diñu bi mni kơ Yêhôwa kyua klei khăp Ñu, kyua bruă yuôm bhăn Ñu ngă leh kơ phung anak mnuih!

³² Brei diñu Mpŭ mni kơ Ñu hlăm klei phung ƀuôn sang bi kƀĭn, leh anăn bi mni kơ Ñu hlăm klei phung khua mduôn bi kƀĭn.

³³ Yêhôwa bi mlih êa krông jing kdrăn tač, brei akŏ êa jing hĕ lăn thu,

³⁴ mbliư̆ lăn čăt mnơ̆ng jing lăn msĭn, kyua klei ƀai phung dôk tinăn.

³⁵ Ñu bi mlih kdrăn tač brei jing êa ênao, leh anăn lăn thu jing akŏ êa.

³⁶ Leh anăn Ñu brei phung êpa dôk ti anôk anăn, leh anăn digơ̆ mdơ̆ng sa boh ƀuôn dôk.

³⁷ Digơ̆ ngă hma, pla phŭn boh kriăk ƀâo, leh anăn mâo boh lu.

³⁸ Hŏng klei Yêhôwa hơêč hmưi klei jăk jĭn, digơ̆ jing lar êngŭm, leh anăn Ñu amâo bi hrŏ ôh êmô biăp digơ̆.

³⁹ Tơdah diñu hrŏ leh anăn êdu ai kyua klei arăng ktư̆ juă, mâo klei knap mñai leh anăn klei ênguôt;

⁴⁰ Yêhôwa tuh klei bi êmut kơ phung khua kiă kriê, leh anăn brei diñu hiu rưng hlăm kdrăn tač, anôk amâo mâo êlan ôh.

⁴¹ Ƀiădah Ñu dŏng phung ƀun ƀin mơ̆ng klei knap mñai, leh anăn brei găp djuê diñu jing lu msĕ si phung biăp.

⁴² Phung kpă ƀuh klei anăn leh anăn mơak, ƀiădah jih jang phung wê kđhĭp ƀăng kƀông.

⁴³ Hlei pô jing mnuih thâo mĭn, brei ñu răng kơ klei anăn; brei phung mnuih ksiêm mĭn klei khăp Yêhôwa.