Klei Mmuñ Hđăp 10 - Klei Aê Diê Blŭ 2015

Klei Wah Lač Čiăng kơ Aê Diê Bi Rai Phung Ƀai

¹ Ơ Yêhôwa, si ngă Ih dôk kbưi? Si ngă Ih mdăp êjai mâo klei knap mñai?

² Hŏng klei mgao, phung ƀai tiŏ mnuih knap; brei digơ̆ lĕ hlăm kđông diñu ƀêč.

³ Phung ƀai bi mni kơ diñu pô kơ klei ai tiê diñu tluh, leh anăn pô tluh kčưn kơ mnơ̆ng dlao wač leh anăn hngah kơ Yêhôwa.

⁴ Pô ƀai blŭ klei mgao, “Aê Diê amâo bi kmhal ôh,” kyuadah hlăm klei mĭn ñu, “Amâo mâo Aê Diê ôh.”

⁵ Êlan ñu dưi nanao; klei Ih phat kđi dôk dlông hĭn kơ klei ñu dưi ƀuh; ñu mưč kơ jih jang phung roh ñu.

⁶ Ñu mĭn hlăm ai tiê ñu, “Kâo amâo srăng mgei ôh; klei jŭ jhat amâo srăng truh kơ kâo ôh hlăm jih jang ênuk.”

⁷ Ƀăng êgei ñu bŏ hŏng klei tăm pah, klei mplư, leh anăn klei ktư̆ juă; ti gŭ êlah ñu mâo klei soh leh anăn klei wê.

⁸ Ñu dôk kăp ngă giăm ƀuôn; ñu bi mdjiê phung amâo tuôm soh ôh hlăm anôk hgăm. Ală ñu kăp ksiêm čiăng ngă kơ phung knap mñai.

⁹ Ñu dôk hlăm anôk hgăm msĕ si sa drei êmông gu hlăm ƀăng ñu; ñu dôk kăp čiăng mă phung ƀun ƀin; ñu mă digơ̆ tơdah ñu hrui ñuăl ñu.

¹⁰ Ñu buôn, ñu kkui leh anăn phung knap mñai lĕ hlăm kkâo ñu.

¹¹ Pô ƀai mĭn hlăm ai tiê ñu, “Aê Diê wơr bĭt leh, Aê Diê mdăp ƀô̆ mta, leh anăn amâo srăng dlăng ôh.”

¹² Kgŭ bĕ Ih, Ơ Yêhôwa; Ơ Aê Diê, yơr kngan Ih; đăm wơr bĭt ôh phung ƀun ƀin.

¹³ Si ngă pô ƀai mưč kơ Aê Diê? Si ngă ñu lač hlăm ai tiê ñu, “Ih amâo srăng bi kmhal ôh?”

¹⁴ Ih ƀuh leh jih; Ih ƀuh klei knap mñai leh anăn klei dleh, čiăng bi kmhal diñu hŏng kngan Ih. Pô knap mñai jao ñu pô kơ Ih; Ih jing pô đru phung anak êrĭt.

¹⁵ Bi joh hĕ păl pô ƀai; bi kmhal hĕ klei soh ñu tơl amâo lŏ ƀuh ñu ôh ti anăp Ih.

¹⁶ Yêhôwa jing Mtao nanao hlŏng lar; phung găp djuê mnuih srăng rai tuč mơ̆ng čar Ñu.

¹⁷ Ơ Yêhôwa, Ih hmư̆ klei phung luă gŭ čiăng; Ih srăng bi kjăp ai tiê diñu, Ih srăng mđing knga kơ diñu

¹⁸ čiăng ngă klei kpă kơ phung anak êrĭt leh anăn kơ phung arăng ktư̆ juă, čiăng kơ mnuih mơ̆ng ƀruih lăn amâo lŏ ngă ƀai ôh.