Klei Čŏk Hia 3 - Klei Aê Diê Blŭ 2015

Klei Kmhal Klei Soh leh anăn klei Čang Hmăng

¹ Kâo jing sa čô mnuih tuôm ƀuh leh klei knap mñai kbiă hriê mơ̆ng giê klei Aê Diê ngêñ.

² Ñu atăt gai kâo leh brei kâo êbat hlăm klei mmăt amâo mâo klei mngač ôh;

³ sĭt nik Ñu yơr kngan Ñu bi kdơ̆ng hŏng kâo nanao, nanao jih hruê.

⁴ Ñu brei kđeh leh anăn klĭt kâo tĭ rai, leh anăn bi joh klang kâo.

⁵ Ñu wang kâo leh anăn guôm kâo hŏng klei ênguôt ktrŏ leh anăn klei knap mñai.

⁶ Ñu brei kâo dôk leh hlăm anôk mmăt msĕ si mnuih djiê mơ̆ng sui leh.

⁷ Ñu bư̆ leh mnư̆ jŭm dar kâo, snăn kâo amâo dưi đuĕ ôh; Ñu kă leh kâo hŏng klei săng đai ktrŏ.

⁸ Wăt tơdah kâo iêô leh anăn kwưh kơ klei đru, Ñu hngah amâo hmư̆ ôh klei kâo wah lač.

⁹ Ñu bi gun êlan kâo hŏng boh tâo arăng krah leh, Ñu brei leh êlan kâo jing wê.

¹⁰ Ñu jing kơ kâo msĕ si sa drei kgâo dôk buôn kăp mă, msĕ si sa drei êmông gu dôk kŭp lua anôk hgăm.

¹¹ Ñu bi weh êlan kâo leh anăn hiêk kâo đơ điêt; Ñu lui kâo dôk hjăn.

¹² Ñu ƀêč hna Ñu leh anăn brei kâo jing mnơ̆ng Ñu čiăng mnah.

¹³ Ñu mnah ƀrăm mơ̆ng đĭng tiông Ñu djŏ kma hlăm tiê kơiêng kâo;

¹⁴ kâo jing leh mnơ̆ng jih jang phung ƀuôn sang djă djik djak, jih hruê diñu mmuñ mưč kơ kâo.

¹⁵ Ñu bi bŏ kâo leh hŏng klei ênguôt phĭ, Ñu bi trei bŏ kâo hŏng kyâo brŭ.

¹⁶ Ñu bi joh êgei kâo hŏng boh tâo, leh anăn juă lin kâo hlăm ƀruih lăn.

¹⁷ Ih mđuĕ leh mngăt kâo kbưi mơ̆ng klei êđăp ênang, kâo wơr bĭt leh ya jing klei jăk mơak.

¹⁸ Snăn kâo lač, “Klei ktang leh anăn klei kâo čang hmăng kơ Yêhôwa rai luč jih.”

¹⁹ Kâo hdơr kơ klei knap mñai leh anăn klei kâo hiu rưng, jing kyâo brŭ leh anăn klei ênguôt phĭ!

²⁰ Kâo hdơr nanao kơ klei anăn, leh anăn mngăt kâo dlưh ai.

²¹ Ƀiădah klei anei kâo bi mĭn, snăn yơh kâo mâo klei čang hmăng:

²² kyua klei khăp sĭt suôr Yêhôwa, hmei amâo tuôm tuč ruê̆ ôh, klei Ñu pap amâo tuôm kƀah ôh;

²³ jih klei anăn jing mrâo grăp aguah; klei sĭt suôr Ih jing prŏng snăk.

²⁴ Mngăt kâo lač, “Yêhôwa jing ngăn dưn kơ kâo, snăn kâo srăng čang hmăng kơ Ñu.”

²⁵ Yêhôwa jing jăk kơ hlei pô dôk čang guôn Ñu, kơ hlei pô tui duah Ñu.

²⁶ Jing klei jăk dôk čang guôn hŏng klei ñăt kriêp klei bi mtlaih mơ̆ng Yêhôwa.

²⁷ Jing klei jăk kơ sa čô mnuih gui knông êjai ñu hlăk ai.

²⁸ Brei ñu dôk gŭ hjăn leh anăn ñăt kriêp, kyuadah Yêhôwa brei klei anăn truh kơ ñu;

²⁹ brei ñu kŭp ƀô̆ ti ƀruih lăn — năng ai ăt dưi mâo klei čang hmăng.

³⁰ Brei ñu jao miêng ñu kơ pô čăm, leh anăn tŭ klei arăng bi hêñ.

³¹ Kyuadah Yêhôwa amâo srăng hngah nanao ôh,

³² wăt tơdah Ñu bi truh klei ênguôt, Ñu srăng pap brei tui si klei khăp sĭt suôr Ñu êbeh dlai.

³³ Amâo djŏ hŏng klei čŏng čiăng ôh Ñu bi knap amâodah bi ênguôt phung anak mnuih.

³⁴ Čiăng juă lin ti gŭ jơ̆ng jih jang phung mnă hlăm lăn čar,

³⁵ čiăng hngah klei kpă kơ sa čô mnuih ti anăp Pô Ti Dlông Hĭn,

³⁶ Čiăng mplư bi luč klei găl sa čô mnuih, Yêhôwa amâo tŭ ôh jih klei anăn.

³⁷ Hlei dưi mtă leh anăn klei anăn truh sĭt, tơdah Yêhôwa amâo mtă ôh klei anăn?

³⁸ Amâo djŏ hĕ mơ̆ng ƀăng êgei Pô Ti Dlông Hĭn kbiă hriê klei jăk leh anăn klei jhat?

³⁹ Si ngă sa čô mnuih hdĭp srăng blŭ dŭñ dŭñ kơ klei bi kmhal klei soh ñu?

⁴⁰ Brei drei lông dlăng leh anăn ksiêm êlan drei, leh anăn lŏ wĭt kơ Yêhôwa!

⁴¹ Brei drei yơr kngan leh anăn ai tiê duah Aê Diê hlăm adiê leh anăn wah lač kơ Ñu:

⁴² “Hmei ngă soh leh anăn bi kdơ̆ng leh, leh anăn Ih amâo pap brei ôh.

⁴³ Ih guôm leh Ih pô hŏng klei ngêñ leh anăn tiŏ hmei leh, bi mdjiê hmei leh amâo mâo klei pap ôh.

⁴⁴ Ih guôm Ih pô hŏng knam tơl klei wah lač amâo dưi găn truh kơ Ih ôh.

⁴⁵ Ih mjing hmei leh mnơ̆ng čhŏ leh anăn djah ti krah phung ƀuôn sang.

⁴⁶ Jih jang phung roh hmei mưč kơ hmei.

⁴⁷ Klei huĭ leh anăn ƀăng êlam truh leh kơ hmei, wăt mâo klei bi luč leh anăn klei bi rai msĕ mơh.”

⁴⁸ Ală kâo ƀlĕ êa ală lu msĕ si hnoh êa kyuadah klei bi rai truh kơ phung ƀuôn sang kâo.

⁴⁹ Ală kâo srăng ƀlĕ êa amâo mdei ôh,

⁵⁰ tơl Yêhôwa mơ̆ng adiê iêp dlăng leh anăn ƀuh.

⁵¹ Klei kâo ƀuh bi ênguôt mngăt kâo, kyua klei truh kơ jih jang phung mniê ƀuôn kâo.

⁵² Phung roh kâo duah mnah kâo msĕ si duah mnah sa drei čĭm, phung anăn jing phung roh kâo amâo mâo klei.

⁵³ Diñu dlăm kâo hdĭp hlăm ƀăng êlam leh anăn bhĭr boh tâo ti kâo;

⁵⁴ êa guôm klŭn boh kŏ kâo; kâo lač, “Kâo luč leh.”

⁵⁵ “Kâo iêô wah lač kơ anăn Ih, Ơ Yêhôwa, mơ̆ng anôk êlam hlăm ƀăng.

⁵⁶ Ih hmư̆ leh klei kâo kwưh: ‘Đăm kăt hĕ knga Ih kơ klei kâo ur kwưh kơ klei đru.’

⁵⁷ Ih hriê giăm kâo leh tơdah kâo iêô wah lač kơ Ih; Ih lač leh, ‘Đăm huĭ ôh!’

⁵⁸ Ih mgang leh kđi kâo, Ơ Yêhôwa, Ih bi tui leh klei hdĭp kâo.

⁵⁹ Ih ƀuh leh klei jhat arăng ngă kơ kâo, Ơ Yêhôwa; brei Ih phat brei kđi kâo.

⁶⁰ Ih ƀuh leh jih jang mnêč klei diñu rŭ ênua, jih jang klei diñu čiăng ngă kơ kâo.

⁶¹ Ih hmư̆ leh klei diñu djă djik djak kơ kâo, Ơ Yêhôwa, jih jang klei diñu čiăng ngă kơ kâo.

⁶² Phung roh hŏng kâo blŭ leh anăn mĭn klei jhat bi kdơ̆ng hŏng kâo jih hruê.

⁶³ Dlăng bĕ, thâodah diñu dôk gŭ amâodah dôk dơ̆ng, diñu mmuñ mưč kơ kâo.

⁶⁴ Brei Ih bi wĭt kơ diñu, Ơ Yêhôwa, tui si bruă kngan diñu ngă leh.

⁶⁵ Brei Ih bi khăng ai tiê diñu, brei Ih tăm pah kơ diñu.

⁶⁶ Brei Ih tiŏ diñu hŏng klei ngêñ leh anăn bi rai hĕ diñu mơ̆ng ti gŭ phung adiê Ih, Ơ Yêhôwa.”