Klei Bi Hriêng 9 - Klei Aê Diê Blŭ 2015

Klei Thâo Mĭn leh anăn Klei Mluk

¹ Klei thâo mĭn mdơ̆ng leh sang ñu pô, ñu krah leh kjuh ƀĕ kmeh gơ̆.

² Ñu koh leh hlô mnơ̆ng, bi lŭk leh kpiê ñu, leh anăn mdơ̆ng leh jhưng huă ñu.

³ Ñu tiŏ nao leh phung dĭng buăl mniê ñu, iêô mthưr mơ̆ng anôk dlông hĭn hlăm ƀuôn prŏng,

⁴ “Hlei pô mluk brei mŭt tinei!” Snăn ñu lač kơ phung amâo mâo klei thâo mĭn,

⁵ “Hriê bĕ, ƀơ̆ng mnơ̆ng kâo, leh anăn mnăm kpiê kâo bi lŭk leh.

⁶ Lui hĕ klei mluk leh anăn dôk hdĭp, leh anăn êbat tui hlue êlan klei thâo mĭn.”

⁷ Hlei pô mkra mnuih kreh mưč srăng mă tŭ klei jhat kơ ñu pô, leh anăn hlei pô ƀuah mnuih ƀai srăng mă tŭ klei ñu tăm pah.

⁸ Đăm ƀuah ôh kơ mnuih kreh mưč, huĭdah ñu bi êmut kơ ih; ƀuah kơ mnuih thâo mĭn leh anăn ñu srăng khăp kơ ih.

⁹ Bi hriăm sa čô mnuih thâo mĭn, leh anăn ñu srăng thâo mĭn hĭn; bi hriăm sa čô mnuih kpă ênô, leh anăn ñu srăng thâo lu hĭn.

¹⁰ Klei huĭ mpŭ kơ Yêhôwa jing klei kčưm kơ klei thâo mĭn, leh anăn klei thâo kral Pô Doh Jăk jing klei thâo săng.

¹¹ Kyuadah hŏng kâo yơh ih srăng dôk hdĭp sui hĭn, leh anăn arăng srăng lŏ thiăm kơ thŭn ih dôk hdĭp.

¹² Tơdah ih thâo mĭn, klei thâo mĭn jing yuôm kơ ih pô; tơdah ih kreh mưč, hjăn ih pô srăng klam klei bi kmhal.

¹³ Sa čô mniê khŏ kreh blŭ ktang; ñu jing mluk, amâo thâo boh klei ôh.

¹⁴ Ñu dôk gŭ ti ƀăng bhă sang ñu, ñu dôk gŭ ti anôk dlông hĭn hlăm ƀuôn,

¹⁵ iêô kơ phung găn gao, êbat phă ktuê êlan digơ̆:

¹⁶ “Brei hlei pô mluk mŭt tinei,” ñu lač kơ pô amâo mâo klei thâo mĭn ôh,

¹⁷ “Êa arăng tlĕ jing mmih; leh anăn ƀơ̆ng mnơ̆ng hŏng klei hgăm jing mơak.”

¹⁸ Ƀiădah ñu amâo thâo ôh phung djiê dôk tinăn, leh anăn phung mnuih mniê anăn jak dôk hlăm anôk êlam hĭn hlăm Ƀuôn Phung Djiê.