Klei Bi Hriêng 8 - Klei Aê Diê Blŭ 2015

Klei Bi Mni kơ Klei Thâo Mĭn

¹ Amâo djŏ hĕ klei knhâo dôk iêô? Amâo djŏ hĕ klei thâo mĭn blŭ kraih?

² Ti čŏng čư̆, ti djiêô êlan, wăt ñu dôk ti êlan bi kkuh mơh.

³ Ti djiêo ƀăng jang, ti anăp ƀuôn prŏng, ti anôk mŭt ƀăng jang ñu iêô kraih:

⁴ “Ơ phung êkei, kơ diih yơh kâo iêô, leh anăn asăp kâo bi anăp kơ phung anak mnuih.

⁵ Ơ phung khŏ, brei diih hriăm klei thâo mĭn; Ơ phung mluk, brei diih hriăm klei thâo răng.

⁶ Hmư̆ bĕ, kyuadah kâo srăng blŭ klei yuôm leh anăn kƀông kâo srăng blŭ klei djŏ.

⁷ Kyuadah ƀăng êgei kâo srăng hưn klei sĭt nik, leh anăn kƀông kâo bi êmut kơ klei luar.

⁸ Jih jang klei blŭ mơ̆ng ƀăng êgei kâo jing kpă ênô, amâo mâo klei wê amâodah čhuai ôh.

⁹ Jih jang klei anăn jing mngač kơ pô thâo săng, leh anăn kpă kơ phung mâo leh klei thâo mĭn lu.

¹⁰ Ruah bĕ klei kâo mtô hrô kơ prăk, leh anăn klei thâo săng hrô kơ mah.

¹¹ Kyuadah klei knhâo jing yuôm hĭn kơ boh tâo mngač, ñu mâo ênoh yuôm hĭn kơ jih jang mnơ̆ng ih dưi čiăng.

¹² Kâo gơ̆ klei knhâo, dôk mbĭt hŏng klei thâo mĭn, kâo mâo klei thâo săng leh anăn klei ksiêm.

¹³ Klei huĭ mpŭ kơ Yêhôwa jing klei bi êmut kơ klei jhat, kâo bi êmut kơ klei krưh, klei mgao, êlan klei jhat leh anăn klei blŭ wê.

¹⁴ Klei kčĕ leh anăn klei knhâo jing dŏ kâo, kâo mâo klei thâo mĭn leh anăn klei ktang.

¹⁵ Hŏng kâo, phung mtao thâo kiă kriê, leh anăn phung khua kiă kriê mtrŭn klei bhiăn kpă.

¹⁶ Hŏng kâo, phung khua thâo kiă kriê, leh anăn phung khua prŏng gĭt gai lăn ala.

¹⁷ Kâo khăp kơ phung khăp kơ kâo, leh anăn phung hur har duah kâo srăng ƀuh kâo.

¹⁸ Klei mdrŏng, klei guh kơang, ngăn yuôm dôk sui leh anăn klei đĭ kyar dôk mbĭt hŏng kâo,

¹⁹ Boh kâo jing jăk hĭn kơ mah, jăk hĭn kơ mah doh, leh anăn mnga kâo jing yuôm hĭn kơ prăk doh.

²⁰ Kâo êbat hlăm êlan klei kpă ênô, ti êlan klei djŏ,

²¹ bi mdrŏng phung khăp kơ kâo, leh anăn bi bŏ sang ngăn drăp diñu.

²² Yêhôwa hrih kâo tal êlâo hĭn, bruă tal sa Ñu ngă ênuk đưm.

²³ Aê Diê mjing kâo leh mơ̆ng ênuk đưm, mơ̆ng phŭn êlâo kơ mâo lăn ala.

²⁴ Ñu mjing kâo hlăk ka mâo ƀăng êlam ôh, hlăk ka mâo akŏ êa ƀlĕ ôh.

²⁵ Êlâo kơ Ñu hrih čư̆ jing kjăp, êlâo kơ mâo kbuôn, Ñu mjing kâo leh;

²⁶ êlâo kơ Ñu hrih lăn mbĭt hŏng hma, Amâodah êlâo kơ mâo ƀruih lăn.

²⁷ Tơdah Ñu hrih phung adiê kâo dôk tinăn yơh, tơdah Ñu treh kwang wĭl kơ mbah ƀăng êlam,

²⁸ tơdah Ñu bi kjăp phung knam ti dlông leh anăn tơdah Ñu bi kjăp akŏ êa êlam,

²⁹ tơdah Ñu bi kčah kdriêl kơ êa ksĭ, čiăng kơ êa amâo gao ôh klei Ñu mkă, tơdah Ñu dưm atur lăn ala.

³⁰ Ênuk anăn kâo dôk ti djiêô mbĭt hŏng Ñu jing sa čô mbruă, leh anăn grăp hruê kâo bi mơak kơ Ñu, hơ̆k mơak nanao ti anăp Ñu,

³¹ dôk mơak ti lăn ala Ñu leh anăn mâo klei mơak hŏng phung anak mnuih.

³² Snăn ară anei, Ơ phung anak êkei kâo, hmư̆ kâo bĕ; jăk mơak yơh phung tui hlue êlan kâo.

³³ Dôk hmư̆ bĕ klei kâo mtô leh anăn jing mnuih thâo mĭn, đăm lui hĕ gơ̆ ôh.

³⁴ Jăk mơak yơh mnuih dôk hmư̆ kâo, kăp dlăng grăp hruê ti ƀăng jang kâo, leh anăn dôk guôn ti ƀăng bhă kâo.

³⁵ Kyuadah hlei pô bi tuôm hŏng kâo mâo klei hdĭp, leh anăn mâo klei pap mơ̆ng Yêhôwa.

³⁶ Ƀiădah hlei pô amâo mâo kâo ngă jhat kơ mngăt ñu pô; jih jang phung bi êmut kơ kâo khăp kơ klei djiê.”