Klei Bi Hriêng 7 - Klei Aê Diê Blŭ 2015

¹ Anak kâo, djă pioh klei kâo blŭ, leh anăn mă pioh hlăm ai tiê ih klei kâo mtă.

² Gưt bĕ klei kâo mtă leh anăn ih srăng dôk hdĭp, mă pioh bĕ klei kâo mtă jing msĕ si asăr ală ih.

³ Kă digơ̆ ti kđiêng ih, čih pioh digơ̆ ti mdhă ai tiê ih.

⁴ Lač bĕ kơ klei knhâo, “Ih jing amai kâo,” leh anăn pia klei thâo mĭn jing mah jiăng ih

⁵ čiăng kơ diñu mgang ih kơ mniê knhông, kơ mniê tă tăn blŭ klei myâo mă.

⁶ Sa hruê, kâo dôk ti ƀăng bhă điêt sang kâo, kâo dôk dlăng mơ̆ng anôk anăn.

⁷ Kâo dôk dlăng kơ phung mluk, kâo ƀuh hlăm phung hlăk ai, sa čô êkei amâo mâo klei thâo mĭn ôh.

⁸ Ñu êbat ti kiêng êlan giăm sang mniê knhông anăn dôk, leh anăn ñu êbat êlan nao phă sang mniê anăn.

⁹ Êjai mmăt wai băk, êjai tlam mmăt, êjai mmăt mlam dơ̆ng truh,

¹⁰ Hlăk anăn, sa čô mniê kbiă bi tuôm hŏng ñu, mniê anăn hơô čhiăm ao msĕ si sa čô mniê knhông mâo ai tiê mnêč.

¹¹ Ñu kreh blŭ kraih leh anăn amâo thâo hêñ ôh, ñu amâo thâo dôk hlăm sang ñu pô ôh;

¹² tăp năng hlăm êlan dơ̆ng, tăp năng hlăm anôk sang mnia, leh anăn ñu dôk kăp arăng ti jih jang kiêng êlan.

¹³ Mniê anăn djă kơ̆ng ñu leh anăn čŭm ñu, leh anăn hŏng klei jhŏng lač kơ ñu:

¹⁴ “Kâo myơr leh mnơ̆ng myơr kơ klei êđăp ênang, leh anăn hruê anei kâo bi liê leh ênoh kâo ƀuăn.

¹⁵ Snăn kâo kbiă čiăng bi tuôm hŏng ih, čiăng duah ih, leh anăn kâo ƀuh ih yơh!

¹⁶ Kâo mprăp leh jhưng pĭt kâo hŏng abăn siam ngă hŏng mrai kbuă mơ̆ng čar Êjip.

¹⁷ Kâo krih leh jhưng pĭt kâo hŏng mnơ̆ng ƀâo mngưi, êa drao phĭ, alôê, leh anăn hŏng sinamôn.

¹⁸ Hriê bĕ, brei drei bi hrăp drei pô hŏng klei khăp tơl aguah; brei drei bi mơak kơ drei pô hŏng klei khăp!

¹⁹ Kyuadah ung kâo amâo dôk ti sang ôh, ñu đuĕ hiu leh kơ anôk kbưi.

²⁰ Ñu mă ba kdŭng prăk mbĭt hŏng ñu leh, ñu srăng lŏ wĭt tơdah mlan pŭr.”

²¹ Ñu mplư gơ̆ hŏng lu klei blŭ siam, ñu mtrŭt gơ̆ hŏng klei blŭ myâo mă.

²² Bhiâo riâo rit gơ̆ tui hlue ñu, msĕ si êmô nao kơ anôk arăng čuh, msĕ si sa čô mnuih khŏ arăng kă nao kơ klei bi kmhal,

²³ tơl sa aruăt ƀrăm tlŏ tiê ñu, msĕ si čĭm ruăt djŏ ñuăl, gơ̆ amâo thâo ôh klei anăn srăng bi luč klei hdĭp gơ̆.

²⁴ Ară anei Ơ phung anak êkei kâo, dôk hmư̆ kâo bĕ, leh anăn mđing knga kơ klei kâo blŭ.

²⁵ Đăm brei ai tiê ih weh phă êlan sa čô mniê msĕ snăn ôh; đăm klah đuĕ tui êlan ñu êbat ôh.

²⁶ Kyuadah ñu bi lĕ leh lu mnuih, sĭt nik phung ñu bi mdjiê leh jing lu êdi.

²⁷ Sang ñu jing êlan nao kơ Ƀuôn Phung Djiê, ñu trŭn phă adŭ klei djiê.