Klei Bi Hriêng 6 - Klei Aê Diê Blŭ 2015

Lŏ Brei Klei Răng

¹ Anak kâo, tơdah ih ngă klei rơ̆ng kơ pô riêng gah ih, tơdah ih ngă klei ƀuăn leh kơ pô mkăn,

² tơdah klei ih blŭ kă hruôt ih leh, arăng mă ih leh kyua klei ih blŭ mơ̆ng ƀăng êgei ih,

³ snăn ngă snei, Ơ anak kâo, leh anăn bi mtlaih ih pô, kyuadah ih lĕ leh hlăm kngan pô riêng gah ih: nao bĕ hŏng klei luă gŭ leh anăn kwưh kơ ñu phưi ih!

⁴ Đăm brei ală ih pĭt ôh, kăn brei pŭk ală ih mdei rei.

⁵ Bi mtlaih bĕ ih pô msĕ si ktŏng mơ̆ng kngan mnuih hiu lua, msĕ si čĭm mơ̆ng kngan mnuih hiu wăk.

⁶ Ơ mnuih alah, nao bĕ kơ hdăm; ksiêm dlăng kơ êlan ñu, čiăng kơ ih mâo klei thâo mĭn.

⁷ Ñu amâo mâo khua ôh, kăn mâo pô čuă amâodah pô mtô rei.

⁸ Êjai yan bhang ñu mkra mnơ̆ng ñu ƀơ̆ng huă leh anăn mkăm êjai yan puôt ya mnơ̆ng ñu pioh ƀơ̆ng.

⁹ Ơ mnuih alah, dŭm boh sui ih srăng dôk đih tinăn? Hbĭl ih srăng mdih pĭt?

¹⁰ Ăt čiăng pĭt ală, mdei ƀiă, dôk kuăl kngan ƀiă čiăng pĭt,

¹¹ snăn klei ƀun ƀin srăng truh kơ ih msĕ si mnuih knĕ, leh anăn klei kƀah srăng truh kơ ih msĕ si sa čô mnuih djă mnơ̆ng bi blah.

¹² Sa čô mnuih hơăi mang, mnuih wê, hiu blŭ nanao klei wê.

¹³ Ñu kliêk ală, ñu bi hmô hŏng jơ̆ng, ñu bi knăl hŏng kđiêng.

¹⁴ Ai tiê wê ñu trông čhai kơ klei jhat, duah klei bi mneh msao nanao.

¹⁵ Kyuanăn klei knap mñai srăng truh kơ ñu bhiâo riâo rit, ñu srăng rai mtam, amâo lŏ dưi hlao ôh.

¹⁶ Mâo năm mta klei Yêhôwa bi êmut, boh nik nak mâo kjuh mta klei Ñu ăl snăk:

¹⁷ ală dlăng hŏng klei krưh, êlah blŭ luar, kngan tuh êrah mnuih amâo soh,

¹⁸ ai tiê trông čhai kơ klei jhat, jơ̆ng ruăt čiăng êran nao kơ klei ƀai,

¹⁹ pô hưn klei mčeh, leh anăn pô duah klei bi mneh msao hdơ̆ng ayŏng adei.

Răng kơ Klei Tlĕ Piu

²⁰ Ơ anak êkei kâo, djă pioh klei ama ih mtă, leh anăn đăm lui ôh kơ klei amĭ ih mtô.

²¹ Pioh digơ̆ nanao hlăm ai tiê ih, leh anăn kă digơ̆ ti kkuê ih.

²² Tơdah ih êbat, digơ̆ srăng atăt ih; tơdah ih đih pĭt, digơ̆ srăng kiă kriê ih; tơdah ih srăng mdih pĭt, digơ̆ srăng blŭ kơ ih.

²³ Kyuadah klei mtă jing pui kđen, klei mtô jing klei mngač, leh anăn klei ƀuah čiăng mkra jing êlan nao kơ klei hdĭp,

²⁴ čiăng mgang ih kơ mniê soh jhat, kơ êlah mniê knhông blŭ klei myâo mă.

²⁵ Hlăm ai tiê ih đăm tluh kơ klei siam ñu ôh, leh anăn đăm brei pŭk ală ñu mplư ih ôh.

²⁶ Mniê knhông dưi bi hrŏ ênoh yuôm sa čô êkei jing sa klŏ kpŭng, leh anăn mniê tlĕ piu ƀêč kđông kơ klei hdĭp yuôm.

²⁷ Dưi mơ̆ sa čô êkei pŭ pui ti đah da ñu leh anăn pui amâo ƀơ̆ng čhiăm ao ñu ôh?

²⁸ Amâodah dưi mơ̆ sa čô mnuih êbat ti dlông hdăng ngur leh anăn pui amâo ƀơ̆ng jơ̆ng ñu ôh?

²⁹ Msĕ snăn mơh hlei pô dôk hŏng mô̆ riêng gah ñu; hlei pô ruêh gơ̆ amâo srăng tlaih kơ klei bi kmhal ôh.

³⁰ Arăng amâo bi êmut ôh kơ sa čô mnuih knĕ tơdah ñu tlĕ čiăng bi trei tian ñu êpa,

³¹ leh anăn tơdah arăng hmao mă ñu, ñu srăng čiu kjuh blư̆ lu hĭn, ñu srăng brei jih mnơ̆ng ñu mâo hlăm sang.

³² Hlei pô tlĕ piu amâo mâo klei thâo mĭn ôh; hlei pô ngă msĕ snăn bi rai ñu pô.

³³ Ñu srăng mâo klei êka leh anăn klei hêñ, leh anăn amâo dưi lăm ôh klei ñu hêñ.

³⁴ Kyuadah klei trih brei sa čô ung ngêñ snăk, leh anăn ñu amâo thâo pap ôh tơdah ñu rŭ ênua.

³⁵ Ñu amâo srăng tŭ ôh ngăn ba kđi, kăn ñu srăng hlai ai rei wăt tơdah ih brei lu mnơ̆ng kơ ñu.