Klei Bi Hriêng 4 - Klei Aê Diê Blŭ 2015

Boh Tŭ Dưn Mơ̆ng Klei Knhâo

¹ Ơ phung anak kâo, hmư̆ bĕ klei sa čô ama bi hriăm, mđing knga bĕ čiăng kơ diih dưi mâo klei thâo mĭn.

² Kyuadah kâo brei klei hriăm sĭt kơ diih; đăm lui ôh klei kâo mtô.

³ Êjai kâo jing sa čô anak êkei kơ ama kâo, knŏng hjăn sa čô anak êkei amĭ kâo khăp hơiêng,

⁴ ama kâo bi hriăm kâo, lač kơ kâo, “Brei ai tiê ih djă pioh klei kâo blŭ; gưt kơ klei kâo mtă, leh anăn ih srăng hdĭp.

⁵ Đăm wơr bĭt leh anăn đăm klah đuĕ ôh mơ̆ng klei ƀăng êgei kâo blŭ; mă tŭ bĕ klei knhâo leh anăn klei thâo mĭn.

⁶ Đăm lui klei knhâo, leh anăn ñu srăng kiă kriê ih; khăp kơ ñu, leh anăn ñu srăng mgang ih.

⁷ Klei knhâo jing klei yuôm hĭn; snăn, mă bĕ klei knhâo; hlăm jih mnơ̆ng ih mâo, mă bĕ klei thâo săng.

⁸ Bi yuôm klei knhâo, leh anăn ñu srăng bi mđĭ ih, kmiêk ñu leh anăn ñu srăng mpŭ kơ ih.

⁹ Ñu srăng mđua ti boh kŏ ih sa boh kwang mnga klei pap, ñu srăng mprăp ih hŏng đuôn mtao guh kơang.”

¹⁰ Anak kâo, hmư̆ bĕ leh anăn mă tŭ klei kâo blŭ, čiăng kơ thŭn ih dôk hdĭp srăng jing lu.

¹¹ Kâo mtô leh ih êlan klei knhâo, kâo atăt leh ih hlăm êlan kpă ênô.

¹² Tơdah ih êbat, knhuang ih amâo srăng gun ôh; leh anăn tơdah ih êran, ih amâo srăng têč hnêč ôh.

¹³ Djă pioh klei hriăm, đăm lui ñu ôh; djă pioh ñu bi kjăp, kyuadah ñu jing klei hdĭp ih.

¹⁴ Đăm mŭt ôh hlăm êlan phung ƀai, leh anăn đăm êbat ôh hlăm êlan phung jhat.

¹⁵ Đuĕ dêč kơ êlan anăn, đăm êbat tinăn ôh, weh đuĕ bĕ mơ̆ng anăn, leh anăn nao phă anăp.

¹⁶ Kyuadah diñu amâo dưi pĭt ôh tơdah diñu ka ngă soh; diñu dôk krŏng ală tơdah diñu ka bi lĕ sa čô mnuih ôh.

¹⁷ Kyuadah diñu ƀơ̆ng kpŭng klei ƀai, leh anăn mnăm kpiê klei jhat.

¹⁸ Ƀiădah êlan phung kpă ênô jing msĕ si klei mngač ang dar, klei mngač ñu jing ktang hĭn ƀrư̆ ƀrư̆ tơl truh yang hruê dơ̆ng.

¹⁹ Êlan phung măk ƀai jing msĕ si klei mmăt tĭt; diñu amâo thâo ôh ya mnơ̆ng bi têč hnêč diñu.

²⁰ Anak kâo, hmư̆ bĕ klei kâo blŭ; mđing knga kơ klei kâo lač.

²¹ Đăm brei ñu đuĕ mơ̆ng ală ih ôh, djă pioh ñu hlăm ai tiê ih.

²² Kyuadah ñu jing klei hdĭp kơ phung mâo ñu, leh anăn klei bi suaih kơ jih asei mlei digơ̆.

²³ Êgao hĭn kơ jih mnơ̆ng, kiă kriê ai tiê ih bi jăk, kyuadah mơ̆ng ñu yơh kbiă akŏ klei hdĭp.

²⁴ Đăm lŏ blŭ klei luar ôh, đuĕ kbưi mơ̆ng klei blŭ mdêč mdar.

²⁵ Brei ală ih dlăng phă anăp, đăm dlăng kơ điâo hnuă ôh.

²⁶ Răng bĕ kơ êlan ih êbat, snăn kơh jih êlan ih srăng jing kjăp.

²⁷ Đăm weh kơ điâo hnuă ôh, brei jơ̆ng ih đuĕ bĕ mơ̆ng klei jhat.