Klei Bi Hriêng 3 - Klei Aê Diê Blŭ 2015

Klei Kčĕ kơ Phung Êkei Hlăk Ai

¹ Anak kâo, đăm wơr bĭt ôh klei kâo mtô lač, ƀiădah brei ai tiê ih djă pioh klei kâo mtă,

² kyuadah klei kâo mtô srăng bi sui hruê leh anăn thŭn ih dôk hdĭp, leh anăn srăng brei ih mâo klei đĭ kyar.

³ Đăm brei klei khăp leh anăn klei sĭt suôr tuôm lui ih ôh; kă klei anăn ti kkuê ih, čih klei anăn ti mdhă ai tiê ih.

⁴ Snăn ih srăng mâo klei pap leh anăn klei hing ang jăk ti anăp Aê Diê leh anăn mnuih.

⁵ Knang kơ Yêhôwa hŏng jih ai tiê, đăm knang ôh kơ klei mĭn ih pô.

⁶ Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih.

⁷ Đăm yap ih pô thâo mĭn ôh; huĭ mpŭ bĕ kơ Yêhôwa leh anăn đuĕ bĕ mơ̆ng klei jhat.

⁸ Klei anăn srăng bi hlao kơ kđeh ih, leh anăn lŏ bi mơai asei mlei ih.

⁹ Mpŭ kơ Yêhôwa hŏng mnơ̆ng mơ̆ng klei mdrŏng ih, leh anăn hŏng boh hlâo hlang mơ̆ng bruă ih.

¹⁰ Snăn hjiê ih srăng bŏ dlai, leh anăn čeh ih srăng bŏ ƀim hŏng kpiê mrâo.

¹¹ Anak kâo, đăm bi êmut ôh kơ klei Yêhôwa mkra, leh anăn đăm êdu ai ôh kơ klei Ñu ƀuah.

¹² Kyuadah Yêhôwa mkra hlei pô Ñu khăp, msĕ si sa čô ama ngă kơ anak ñu khăp.

¹³ Jăk mơak yơh mnuih mâo leh klei knhâo, leh anăn mnuih mâo klei thâo săng.

¹⁴ Kyuadah mnga ñu jăk hĭn kơ prăk, leh anăn klei tŭ dưn ñu yuôm hĭn kơ mah.

¹⁵ Ñu jing yuôm hĭn kơ boh tâo mngač, ñu jing yuôm hĭn kơ jih jang mnơ̆ng arăng čiăng mâo.

¹⁶ Hlăm kngan hnuă ñu mâo klei hdĭp sui; hlăm kngan điâo ñu mâo klei mdrŏng sah leh anăn klei mpŭ.

¹⁷ Êlan ñu jing êlan mơak, leh anăn jih jang êlan ñu jing klei êđăp ênang.

¹⁸ Ñu jing sa ƀĕ ana kyâo klei hdĭp kơ phung duah ñu, leh anăn arăng pia phung hơ̆k mơak kơ phung djă pioh ñu kjăp.

¹⁹ Hŏng klei knhâo Yêhôwa mdơ̆ng atur lăn ala, hŏng klei thâo săng Ñu bi kjăp phung adiê.

²⁰ Hŏng klei thâo mĭn Ñu ƀăng êlam bluh êa, leh anăn knam bi rôč êa nguôm.

²¹ Anak kâo, djă pioh klei knhâo leh anăn klei thâo răng, đăm brei diñu ñăk đuĕ mơ̆ng ih ôh.

²² Snăn diñu srăng jing klei hdĭp kơ mngăt ih, leh anăn mnơ̆ng siam băk kkuê ih.

²³ Hlăk anăn ih srăng êbat êlan ih hŏng klei hơĭt, leh anăn jơ̆ng ih amâo srăng têč hnêč ôh.

²⁴ Tơdah ih dôk gŭ ih amâo srăng huĭ ôh, tơdah ih đih ih srăng pĭt êđăp ênang.

²⁵ Đăm hyưt ôh kơ klei jŭ jhat truh bhiâo riâo rit, kăn huĭ rei tơdah phung ƀai rai tuč,

²⁶ kyuadah Yêhôwa srăng jing Pô ih knang, leh anăn Ñu srăng mgang jơ̆ng ih tlaih mơ̆ng kđông.

²⁷ Đăm hngah ôh ngă jăk kơ pô yuôm čiăng mâo klei anăn, tơdah ih mâo klei dưi ngă klei anăn kơ ñu.

²⁸ Đăm lač ôh kơ pô riêng gah ih, “Nao leh anăn lŏ hriê bĕ, kâo srăng brei kơ ih mgi” — tơdah ih mâo leh mnơ̆ng brei anăn.

²⁹ Đăm trông čhai čiăng ngă jhat kơ pô riêng gah ih ôh, kyuadah ñu dôk giăm ih leh anăn knang kơ ih.

³⁰ Đăm bi tăng hŏng arăng amâo mâo klei ôh, tơdah arăng amâo tuôm ngă jhat kơ ih ôh.

³¹ Đăm tluh jing msĕ si mnuih jhŏng ƀai ôh, leh anăn đăm tui hlue êlan ñu ôh.

³² Kyuadah Yêhôwa bi êmut kheh kơ mnuih wê, ƀiădah Ñu jing mah jiăng hŏng mnuih kpă.

³³ Klei Yêhôwa tăm pah dôk ti sang mnuih ƀai, ƀiădah Ñu hơêč hmưi klei jăk jĭn kơ sang pô kpă ênô.

³⁴ Ñu mưč kơ phung mưč, ƀiădah Ñu pap kơ phung luă gŭ.

³⁵ Phung knhâo srăng dưn klei mpŭ, ƀiădah phung mluk mâo klei hêñ.