Klei Bi Hriêng 23 - Klei Aê Diê Blŭ 2015

¹ Tơdah ih dôk gŭ huă ƀơ̆ng mbĭt hŏng sa čô khua kiă kriê, răng bĕ kơ mnơ̆ng arăng mdơ̆ng ti anăp ih,

² leh anăn dưm sa ƀĕ dhŏng ti đŏk ih tơdah ih jing sa čô ră.

³ Đăm tluh ôh kơ mnơ̆ng ƀơ̆ng huă jăk phung khua kiă kriê, kyuadah dŏ anăn jing mnơ̆ng ƀơ̆ng huă dưi mplư.

⁴ Đăm bi dleh ih pô kyua čiăng jing mdrŏng ôh, brei ih mâo klei thâo mĭn hĭn kơ klei anăn.

⁵ Tơdah ih dlăng kơ klei mdrŏng, nĕ anei ñu đuĕ leh; kyuadah klei mdrŏng mkra siap kơ ñu pô leh anăn msĕ si tlang ñu phiơr đuĕ phă adiê.

⁶ Đăm ƀơ̆ng ôh mnơ̆ng ƀơ̆ng huă mnuih mâo ală dlăng hŏng klei jhat, đăm tluh ôh kơ mnơ̆ng ƀơ̆ng huă jăk ñu,

⁷ kyuadah ñu jing msĕ si pô mĭn hlăm ai tiê ñu, lač, “Ƀơ̆ng, mnăm bĕ,” ƀiădah ai tiê ñu amâo mĭn msĕ snăn ôh.

⁸ Ih srăng ô̆ mnơ̆ng ih ƀơ̆ng leh, leh anăn klei ih blŭ jăk srăng luč hơăi mang.

⁹ Đăm blŭ ôh kơ knga mnuih mluk, kyuadah ñu srăng bi êmut kơ klei thâo mĭn klei ih blŭ.

¹⁰ Đăm bi mlih ôh knông lăn hđăp, leh anăn đăm plah mă ôh hma phung anak êrĭt,

¹¹ kyuadah Pô Bi Tui diñu jing myang, Ñu srăng mgang kđi digơ̆ bi kdơ̆ng hŏng ih.

¹² Hŏng jih ai tiê duah klei hriăm, leh anăn mđing knga kơ klei thâo săng.

¹³ Đăm hngah mkra anak ih ôh, tơdah ih čăm ñu hŏng giê hnuăt, ñu amâo srăng djiê ôh.

¹⁴ Čăm ñu hŏng giê hnuăt, leh anăn ih srăng bi mtlaih mngăt ñu mơ̆ng Ƀuôn Phung Djiê.

¹⁵ Ơ Anak kâo, tơdah ai tiê ih thâo mĭn, ai tiê kâo srăng hơ̆k mơak.

¹⁶ Prôč tiê kâo srăng mơak, tơdah êlah ih blŭ klei djŏ.

¹⁷ Đăm brei ai tiê ih tluh kơ phung soh ôh, ƀiădah brei ih huĭ mpŭ kơ Yêhôwa grăp hruê.

¹⁸ Sĭt nik ih srăng mâo klei mưn êdei, leh anăn klei ih čang hmăng amâo srăng rai tuč ôh.

¹⁹ Dôk hmư̆ bĕ, Ơ anak kâo, leh anăn jing thâo mĭn, atăt ai tiê ih hlăm êlan kpă.

²⁰ Đăm bi mguôp mbĭt hŏng phung kreh mnăm kpiê ôh, amâodah hŏng phung ră ƀơ̆ng čĭm,

²¹ kyuadah mnuih kreh kpiê ruă leh anăn ră srăng kƀah, leh anăn mnuih kreh pĭt srăng hơô ao tĭ.

²² Mđing knga kơ ama ih, pô kkiêng kơ ih, leh anăn đăm bi êmut ôh kơ amĭ ih tơdah gơ̆ mduôn leh.

²³ Blei bĕ klei sĭt nik, đăm čhĭ hĕ ôh, blei klei thâo mĭn, klei mjuăt, leh anăn klei thâo săng;

²⁴ Ama mnuih kpă srăng mâo klei hơ̆k mơak prŏng, hlei pô mâo sa čô anak thâo mĭn srăng mâo klei hơ̆k kyua gơ̆.

²⁵ Brei amĭ ama ih mâo klei hơ̆k, brei pô kkiêng kơ ih dôk mơak.

²⁶ Ơ anak êkei kâo, jao bĕ ai tiê ih kơ kâo, leh anăn brei ală ih djă pioh êlan kâo.

²⁷ Kyuadah mniê êgar jing ƀăng êlam, leh anăn mniê knhông jing sa kbăng kniă.

²⁸ Ñu dôk kăp msĕ si sa čô mnuih knĕ, leh anăn ñu brei lu phung êkei jing phung lhiăr.

²⁹ Hlei pô mâo klei knap? Hlei pô mâo klei ênguôt? Hlei pô bi mneh msao? Hlei pô blŭ dŭñ dŭñ? Hlei pô êka amâo thâo mơ̆ng ñu mâo klei êka? Hlei pô mâo ală hrah?

³⁰ Jing phung dôk mnăm kpiê sui, phung nao mnăm kpiê arăng bi lŭk.

³¹ Đăm dôk dlăng ôh kơ kpiê tơdah ñu hrah huč, tơdah ñu mngač hlăm kčok, leh anăn arăng dưi lun ênưih.

³² Ti knhal tuč ñu kĕ msĕ si ala, leh anăn ñu čoh msĕ si ala kpơ̆ng.

³³ Ală ih srăng dlăng kơ phung mniê knhông, leh anăn ih srăng blŭ klei čhŏ mrŏ.

³⁴ Ih srăng jing msĕ si sa čô mnuih đih ti krah êa ksĭ, msĕ si sa čô mnuih đih ti ƀrŏng sa ƀĕ gơ̆ng.

³⁵ Ih srăng lač, “Arăng čăm kâo, ƀiădah kâo amâo ruă ôh? Arăng biêng kâo, ƀiădah kâo amâo thâo ôh! Hbĭl kâo srăng mdih? Kâo srăng duah lŏ mnăm mơh.”