Klei Bi Hriêng 21 - Klei Aê Diê Blŭ 2015

¹ Ai tiê mtao jing msĕ si sa hnoh êa hlăm kngan Yêhôwa, Yêhôwa brei gơ̆ đoh phă anôk Ñu čiăng.

² Jih jang êlan mnuih jing kpă kơ ală gơ̆ pô, ƀiădah Yêhôwa ksiêm ai tiê.

³ Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang.

⁴ Ală dlăng krưh leh anăn ai tiê mgao, pui kđen pô ƀai — jih jang anăn jing soh!

⁵ Hdră mnuih kriăng atăt kơ klei bŏ dlai, ƀiădah ngă hŏng klei jêč srăng atăt kơ klei kƀah.

⁶ Ngăn drăp mâo hŏng klei luar jing sa klei hơăi mang djăl luč kơ phung duah klei djiê.

⁷ Klei măk ƀai phung wê srăng bi rai diñu pô, kyuadah diñu hngah ngă klei djŏ.

⁸ Êlan mnuih soh jing wê, ƀiădah bruă mnuih doh jing kpă.

⁹ Jăk hĭn dôk ti dlông kiêng čuôr găp, kơ dôk hlăm sang mbĭt hŏng sa čô mô̆ kreh bi mneh msao.

¹⁰ Mnuih ƀai tluh kơ klei jhat, ñu amâo thâo pap kơ pô riêng gah ñu ôh.

¹¹ Tơdah arăng bi kmhal pô mưč, pô mluk srăng jing thâo mĭn, tơdah arăng bi hriăm mnuih knhâo ñu mă tŭ klei thâo mĭn.

¹² Aê Diê, Pô kpă ênô ksiêm dlăng sang mnuih ƀai, leh anăn klư̆ phung ƀai hlăm klei knap mñai.

¹³ Hlei pô kăt ƀăng knga kơ klei mnuih ƀun ƀin ur, ñu pô srăng ur krao leh anăn arăng amâo srăng hmư̆ ñu ôh.

¹⁴ Mnơ̆ng brei hŏng klei hgăm bi hlai klei ăl, leh anăn ngăn sun hŏng klei hgăm dưi bi hlao wăt klei ngêñ ktang.

¹⁵ Tơdah arăng ngă klei djŏ phung kpă ênô hơ̆k mơak, ƀiădah phung ngă jhat srăng mâo klei huĭ snăk.

¹⁶ Mnuih weh đuĕ mơ̆ng êlan klei thâo săng srăng dôk ti anôk phung djiê bi kƀĭn.

¹⁷ Hlei pô khăp kơ klei hlăp mơak srăng jing pô ƀun ƀin; hlei pô khăp kơ kpiê leh anăn êa boh ôliwơ amâo srăng tuôm jing mdrŏng ôh.

¹⁸ Mnuih ƀai jing mnơ̆ng bi tui mnuih kpă ênô, leh anăn mnuih amâo sĭt suôr ôh jing mnơ̆ng bi tui mnuih ênuah ênô.

¹⁹ Jăk hĭn dôk hlăm anôk êhiŏ êyăng kơ dôk mbĭt hŏng sa čô mô̆ kreh bi mneh msao leh anăn ră ăl.

²⁰ Phung knhâo pioh ngăn dŏ yuôm leh anăn êa prăi boh ôliwơ, ƀiădah mnuih mluk ƀơ̆ng hĕ mnơ̆ng ñu mâo.

²¹ Hlei pô tui duah klei kpă ênô leh anăn klei khăp srăng ƀuh klei hdĭp, klei kpă ênô, leh anăn klei arăng mpŭ.

²² Mnuih thâo mĭn ksŭng mblah ƀuôn prŏng phung jhŏng ktang, leh anăn ñu bi êbuh kđông kjăp digơ̆ knang.

²³ Hlei pô răng kơ ƀăng êgei leh anăn êlah ñu mgang mngăt ñu pô kơ klei rŭng răng.

²⁴ Arăng pia “mnuih kreh mưč” kơ pô mgao leh anăn krưh, ñu hdĭp hŏng klei mgao snăk.

²⁵ Klei mnuih alah tluh čiăng bi mdjiê ñu pô, kyuadah kngan ñu hngah mă bruă.

²⁶ Jih hruê ñu knŏng tluh mnơ̆ng, ƀiădah mnuih kpă ênô brei amâo hơưi ôh.

²⁷ Yêhôwa bi êmut kheh kơ mnơ̆ng phung ƀai ngă yang, ƀai hĭn tơdah diñu myơr hŏng klei mtrŭt ƀai.

²⁸ Pô hưn luar srăng rai tuč, ƀiădah mnuih thâo gưt srăng dưi blŭ nanao.

²⁹ Mnuih ƀai mgưt ngă jhŏng, ƀiădah mnuih kpă ênô bi kjăp êlan ñu pô.

³⁰ Amâo mâo klei thâo mĭn amâodah klei thâo săng, kăn mâo klei bi kčĕ rei dưi bi kdơ̆ng hŏng Yêhôwa.

³¹ Aseh mprăp pioh kơ hruê bi blah, ƀiădah Yêhôwa yơh brei klei dưi.