Klei Bi Hriêng 14 - Klei Aê Diê Blŭ 2015

¹ Mniê thâo mĭn mdơ̆ng sang ñu, ƀiădah hŏng kngan ñu pô mniê mluk ruh sang ñu.

² Hlei pô êbat hlăm klei kpă huĭ mpŭ kơ Yêhôwa, ƀiădah hlei pô ngă klei wê bi êmut kơ Ñu.

³ Klei phung mnuih mluk blŭ jing msĕ si sa ƀĕ giê čăm diñu, ƀiădah êlah phung thâo mĭn srăng mgang diñu pô.

⁴ Tơdah amâo mâo êmô, amâo mâo mdiê ôh, ƀiădah kyua klei mơai êmô yơh arăng wiă mdiê êbeh dlai.

⁵ Sa čô pô hưn sĭt suôr amâo mplư ôh, ƀiădah sa čô pô hưn amâo sĭt suôr blŭ klei luar.

⁶ Mnuih kreh mưč duah klei thâo mĭn ƀiădah amâo ƀuh ôh, ƀiădah klei thâo mĭn jing ênưih kơ pô mâo klei thâo săng.

⁷ Brei ih đuĕ mơ̆ng mnuih mluk, diñu amâo dưi bi hriăm ih klei thâo mĭn ôh.

⁸ Klei thâo mĭn mnuih thâo răng jing klei ksiêm êlan ñu, ƀiădah klei mluk phung mluk jing klei mplư.

⁹ Phung mluk mưč kơ klei kmhal kơ klei soh, ƀiădah phung kpă ênô čiăng mâo klei pap ti anăp Aê Diê.

¹⁰ Ai tiê pô thâo kral klei ênguôt ñu pô, sa čô mkăn amâo thâo bi mbha ôh klei ñu hơ̆k.

¹¹ Arăng srăng bi rai sang phung ƀai, ƀiădah sang phung kpă srăng đĭ kyar.

¹² Mâo êlan mnuih yap msĕ si kpă, ƀiădah ti knhal tuč ñu atăt kơ klei djiê.

¹³ Wăt êjai mâo klei tlao, ai tiê ăt mâo klei ênguôt, leh anăn êdei kơ klei hơ̆k dưi mâo klei ênguôt.

¹⁴ Phung wê srăng ƀơ̆ng boh klei wê diñu, leh anăn phung mnuih jăk srăng mâo klei mưn mơ̆ng bruă jăk diñu.

¹⁵ Mnuih mluk đăo kơ jih jang klei, ƀiădah mnuih thâo răng ksiêm kơ êlan ñu êbat.

¹⁶ Mnuih thâo mĭn thâo răng leh anăn weh đuĕ mơ̆ng klei soh, ƀiădah mnuih mluk ngă mgao amâo thâo răng ôh.

¹⁷ Hlei pô djăl ăl ngă klei mluk, mnuih mâo mnêč jhat arăng bi êmut.

¹⁸ Phung amâo thâo mĭn ôh dưn tŭ klei mluk, ƀiădah phung thâo răng mâo đuôn mtao klei thâo săng.

¹⁹ Phung jhat srăng buôn ti anăp mnuih jăk, leh anăn phung ƀai srăng luă gŭ ti anăp ƀăng bhă phung kpă ênô.

²⁰ Wăt phung riêng gah bi êmut mơh kơ mnuih ƀun ƀin, ƀiădah phung mdrŏng mâo lu mah jiăng.

²¹ Hlei pô bi êmut kơ pô riêng gah ñu, ñu anăn jing mnuih soh, ƀiădah jăk mơak yơh hlei pô pap kơ phung ƀun ƀin.

²² Amâo djŏ hĕ phung trông čhai kơ klei jhat ngă soh, ƀiădah phung trông čhai kơ klei jăk mâo klei khăp leh anăn klei sĭt suôr?

²³ Jih jang bruă suăi mâo klei tŭ dưn, ƀiădah klei knŏng blŭ atăt kơ klei ƀun ƀin.

²⁴ Đuôn mtao kơ phung thâo mĭn jing klei mdrŏng, ƀiădah klei mluk jing klei mưn kơ phung mluk.

²⁵ Pô hưn klei sĭt bi mtlaih mngăt arăng, ƀiădah mnuih blŭ luar jing pô lhiăr.

²⁶ Hlei pô huĭ mpŭ kơ Yêhôwa mâo klei knang kjăp, klei anăn srăng jing anôk kđap kơ phung anak Ñu.

²⁷ Klei huĭ mpŭ kơ Yêhôwa jing akŏ êa kơ klei hdĭp, čiăng bi weh đuĕ arăng mơ̆ng kđông klei djiê.

²⁸ Klei guh kơang kơ mtao jing phung ƀuôn sang lu, ƀiădah klei kƀah mnuih ƀuôn sang jing klei rai tuč kơ khua kiă kriê.

²⁹ Hlei pô êmưt krêñ mâo klei thâo săng prŏng, ƀiădah hlei pô djăl ăl ngă klei mluk.

³⁰ Ai tiê êđăp ênang brei klei hdĭp kơ asei mlei, ƀiădah klei nač jing iêng ƀơ̆ng klang.

³¹ Hlei pô ktư̆ juă mnuih ƀun ƀin dlao wač kơ Pô Mjing gơ̆, ƀiădah hlei pô pap kơ mnuih ƀun ƀin mpŭ kơ Pô Mjing gơ̆.

³² Mnuih ƀai dlưh kyua klei soh ñu pô ngă, ƀiădah mnuih kpă ênô wăt hlăk ñu djiê ăt mâo anôk đuĕ dăp.

³³ Klei thâo mĭn dôk hlăm ai tiê pô thâo săng, ƀiădah ai tiê phung mluk amâo thâo ñu ôh.

³⁴ Klei kpă ênô bi mđĭ sa phung găp djuê mnuih, ƀiădah klei soh jing klei bi hêñ kơ phung ƀuôn sang.

³⁵ Mtao khăp kơ dĭng buăl ngă hŏng klei thâo mĭn, ƀiădah ñu srăng ngêñ kơ pô ngă klei hêñ.