Klei Bi Hriêng 10 - Klei Aê Diê Blŭ 2015

¹ Klei Mtao Salômôn blŭ bi hriêng: Sa čô anak êkei thâo mĭn bi mơak kơ ama ñu, ƀiădah sa čô anak êkei mluk bi ênguôt amĭ ñu.

² Dŏ ngăn arăng mâo hŏng klei amâo kpă amâo jing yuôm ôh, ƀiădah klei kpă ênô bi mtlaih mơ̆ng klei djiê.

³ Yêhôwa amâo brei ôh phung kpă ênô ư̆ êpa, ƀiădah Ñu hngah klei phung ƀai tluh.

⁴ Hlei pô alah mă bruă bi ƀun ƀin ñu pô, ƀiădah kngan pô kriăng bi mdrŏng.

⁵ Sa čô anak êkei mkăm pioh êjai yan bhang jing thâo mĭn, ƀiădah sa čô anak êkei pĭt êjai yan puôt brei klei hêñ.

⁶ Mâo klei jăk jĭn ti dlông boh kŏ mnuih kpă ênô, ƀiădah ƀăng êgei phung ƀai mdăp klei jhat.

⁷ Klei hdơr kơ mnuih kpă ênô jing klei jăk jĭn, ƀiădah anăn phung jhat ƀai srăng luč rai.

⁸ Hlei pô mâo ai tiê thâo mĭn srăng gưt klei mtă, ƀiădah pô mluk kreh blŭ srăng rai luč.

⁹ Hlei pô êbat hlăm klei ênuah ênô êbat hŏng klei hnŭk ênang, ƀiădah hlei pô êbat êlan wê arăng srăng mâo mă.

¹⁰ Hlei pô kliêk ală ngă klei rŭng, pô mluk blŭ lu srăng rai luč.

¹¹ Ƀăng êgei mnuih kpă ênô jing akŏ klei hdĭp, ƀiădah ƀăng êgei phung ƀai mdăp klei jhat.

¹² Klei bi êmut mčhur klei bi msao, ƀiădah klei khăp guôm jih klei soh.

¹³ Mnuih thâo săng blŭ klei knhâo, ƀiădah pô kƀah klei thâo săng arăng srăng čăm hŏng giê hnuăt.

¹⁴ Phung thâo mĭn mkuôm pioh klei thâo mĭn lu, ƀiădah klei mnuih mluk blŭ brei klei bi rai truh.

¹⁵ Ngăn drăp mnuih mdrŏng jing msĕ si kđông kjăp kơ ñu, klei phung ƀun ƀin kƀah mjing klei bi rai kơ diñu.

¹⁶ Ênoh mưn kơ mnuih kpă ênô atăt kơ klei hdĭp, boh mnga mnuih jhat mâo atăt kơ klei bi kmhal.

¹⁷ Hlei pô tŭ klei bi hriăm dôk hlăm êlan nao kơ klei hdĭp, ƀiădah hlei pô hngah klei mkra srăng klah đuĕ.

¹⁸ Hlei pô mdăp klei bi êmut mâo kƀông luar, leh anăn hlei pô blŭ mčeh jing sa čô mluk.

¹⁹ Hlăm klei arăng blŭ lu ênưih mâo klei soh, ƀiădah pô răng kơ êlah ñu jing pô thâo mĭn.

²⁰ Êlah mnuih kpă ênô jing msĕ si prăk doh, ai tiê phung ƀai amâo yuôm ôh.

²¹ Êlah pô kpă ênô čiêm lu mnuih, ƀiădah phung mluk djiê kyua kƀah klei thâo săng.

²² Klei jăk jĭn Yêhôwa bi mdrŏng mnuih, leh anăn Ñu amâo lŏ thiăm klei ênguôt ôh.

²³ Sa čô mluk yap klei ngă soh jing msĕ si klei hlăp, ƀiădah klei ngă hŏng klei thâo mĭn bi mơak kơ pô mâo klei thâo săng.

²⁴ Klei phung ƀai hyưt srăng truh kơ diñu pô, ƀiădah arăng srăng brei ya klei mnuih kpă ênô čiăng.

²⁵ Tơdah angĭn êbŭ êgao leh, amâo lŏ mâo phung ƀai ôh, ƀiădah mnuih kpă ênô dôk kjăp hlŏng lar.

²⁶ Msĕ si êa msăm ngă kơ êgei leh anăn săp pui ngă kơ ală, msĕ snăn mnuih alah jing kơ pô tiŏ nao ñu.

²⁷ Klei huĭ mpŭ kơ Yêhôwa bi sui hruê arăng dôk hdĭp, ƀiădah thŭn phung soh dôk hdĭp jing ƀiă.

²⁸ Klei phung kpă ênô čang hmăng srăng truh hŏng klei hơ̆k, ƀiădah klei phung ƀai čang guôn amâo srăng truh ôh.

²⁹ Êlan Yêhôwa jing kđông mgang kơ phung kpă ênô, ƀiădah jing klei bi rai kơ phung ngă ƀai.

³⁰ Phung kpă ênô amâo srăng mgei ôh, ƀiădah phung ƀai amâo srăng dôk hlăm čar ôh.

³¹ Ƀăng êgei mnuih kpă ênô bi kbiă klei thâo mĭn, ƀiădah arăng srăng khăt hĕ êlah phung wê.

³² Êlah mnuih kpă ênô thâo blŭ klei bi mơak, ƀiădah ƀăng êgei phung ƀai blŭ klei wê.