II Y-Timôthê 2 - Klei Aê Diê Blŭ 2015

Sa Čô Kahan Sĭt Suôr kơ Krist Yêsu

¹ Snăn, Ơ anak êkei kâo, jing ktang bĕ hŏng klei pap hlăm Krist Yêsu.

² Ya klei ih hmư̆ leh mơ̆ng kâo ti anăp lu phung hưn bi sĭt, brei ih jao klei anăn kơ phung mnuih sĭt suôr srăng dưi mtô kơ phung mkăn msĕ mơh.

³ Tŭ bĕ klei knap mñai mbĭt hŏng kâo msĕ si sa čô kahan jăk Krist Yêsu.

⁴ Amâo mâo ôh sa čô kahan bi lŭk bruă ñu hŏng bruă ƀuôn sang, čiăng kơ bruă ñu bi mơak kơ pô iêô ñu jing kahan.

⁵ Leh anăn sa čô bi lông êran amâo mă tŭ ôh klei mưn knŏng tơdah ñu êran tui si klei bhiăn.

⁶ Pô mă bruă hma hŏng klei suăi năng dưn boh mnga êlâo hĭn.

⁷ Ksiêm mĭn bĕ kơ klei kâo lač, kyuadah Khua Yang srăng brei kơ ih klei thâo săng hlăm jih jang klei.

⁸ Brei ih hdơr kơ Yêsu Krist, Pô Aê Diê bi kbiă lŏ hdĭp leh mơ̆ng phung djiê, jing anak čô găp djuê Y-Đawit, tui si klei mrâo mrang jăk kâo mtô.

⁹ Kyua klei mrâo mrang jăk anăn kâo tŭ klei knap mñai leh anăn arăng kă hŏng klei săng đai msĕ si sa čô mnuih soh prŏng. Ƀiădah amâo mâo pô dưi kă ôh klei Aê Diê blŭ.

¹⁰ Kyuanăn kâo gĭr tŭ jih kyua phung Aê Diê ruah leh, čiăng kơ diñu msĕ mơh dưi mâo klei bi mtlaih hlăm Krist Yêsu mbĭt hŏng klei guh kơang hlŏng lar.

¹¹ Klei blŭ anei jing sĭt nik: Tơdah drei djiê leh mbĭt hŏng Ñu, drei srăng lŏ hdĭp mbĭt hŏng Ñu msĕ mơh;

¹² tơdah drei gĭr, drei srăng kiă kriê mbĭt hŏng Ñu msĕ mơh; tơdah drei hngah kơ Ñu, Ñu srăng hngah kơ drei msĕ mơh;

¹³ tơdah drei amâo dôk sĭt suôr ôh, Ñu ăt dôk sĭt suôr — kyuadah Ñu amâo dưi hngah kơ Ñu pô ôh.

Sa Čô Mă Bruă Bi Mơak kơ Aê Diê

¹⁴ Brei diñu lŏ hdơr klei anei, leh anăn mtă kơ diñu ti anăp Khua Yang brei diñu hngah klei bi tăng kơ boh blŭ, klei anăn amâo tŭ dưn ôh, knŏng bi rai phung dôk hmư̆.

¹⁵ Mă bruă bĕ hŏng jih ai tiê čiăng jing mnuih Aê Diê tŭ, sa čô mă bruă amâo mâo klei hêñ ôh, thâo mtô bi djŏ klei blŭ sĭt nik Aê Diê.

¹⁶ Hngah kơ klei blŭ hơăi mang, čhŏ mrŏ, kyuadah hlei pô ngă klei anăn srăng nao kjham hĭn hlăm klei amâo thâo mpŭ kơ Aê Diê,

¹⁷ leh anăn klei diñu blŭ srăng ƀơ̆ng msĕ si klei brŭ lar. Hlăm phung anăn mâo Y-Himênê leh anăn Y-Philêt.

¹⁸ Diñu klah đuĕ leh mơ̆ng klei sĭt nik, êjai lač klei kbiă lŏ hdĭp truh leh. Diñu bi lĕ klei đăo đa đa mnuih.

¹⁹ Ƀiădah atur Aê Diê ăt dôk kjăp, mâo klei kđăm anei: “Khua Yang thâo kral hlei phung jing dŏ Ñu,” leh anăn “Brei grăp čô hlei pô iêô anăn Khua Yang, đuĕ kbưi mơ̆ng klei soh.”

²⁰ Hlăm sa boh sang prŏng amâo djŏ ôh knŏng mâo čhiên mngan mah leh anăn prăk, ƀiădah mâo msĕ mơh čhiên mngan kyâo leh anăn lăn lŭ, đa arăng yua kơ bruă mpŭ, đa arăng yua kơ bruă amâo mpŭ ôh.

²¹ Kyuanăn hlei bi doh ñu pô mơ̆ng klei čhŏ mrŏ anăn, ñu srăng jing čhiên mngan khua yua kơ bruă mpŭ, doh jăk, leh anăn tŭ dưn kơ khua ñu, pioh kơ jih bruă jăk.

²² Snăn brei ih hngah kơ klei kđeh tluh phung hlăk ai, leh anăn tui duah klei kpă ênô, klei đăo, klei khăp, leh anăn klei êđăp ênang, mbĭt hŏng phung iêô wah lač kơ anăn Khua Yang hŏng ai tiê doh.

²³ Hngah kơ klei bi tăng mluk amâo mâo klei yuôm ôh. Ih thâo leh klei anăn dưi bi truh klei bi msao.

²⁴ Leh anăn dĭng buăl Khua Yang amâo dưi bi msao ôh, ƀiădah jing êmhač hŏng jih jang, sa čô thâo mtô jăk, leh anăn thâo gĭr,

²⁵ mkra phung bi kdơ̆ng hŏng pô hŏng klei êdu. Năng ai Aê Diê srăng brei diñu kmhal kơ klei soh leh anăn truh kơ klei thâo săng klei sĭt nik,

²⁶ leh anăn diñu lŏ hdơr leh anăn đuĕ mơ̆ng kđông yang jhat, pô mă čăp leh diñu brei ngă klei ñu čiăng.