II Klei Yăl Dliê 17 - Klei Aê Diê Blŭ 2015

Y-Jôsaphat Bi Kjăp Ƀuôn Ala Mtao Ñu

¹ Y-Jôsaphat anak êkei ñu kiă kriê čuê ñu, leh anăn bi ktang ñu pô čiăng bi kdơ̆ng hŏng phung Israel.

² Ñu dưm phung kahan hlăm jih jang ƀuôn mâo kđông kahan hlăm čar Yuđa, leh anăn ngă kđông kahan hlăm čar Yuđa leh anăn hlăm ƀuôn čar Êphraim, ƀuôn ama ñu Y-Asa plah mă leh.

³ Yêhôwa dôk mbĭt hŏng Y-Jôsaphat, kyuadah ñu êbat tui hlue êlan ama ñu êbat leh hlăm ênuk mphŭn êlâo. Ñu amâo duah yang Baal ôh,

⁴ ƀiădah duah Aê Diê ama ñu leh anăn êbat tui hlue klei Gơ̆ mtă, leh anăn amâo ngă ôh tui si phung Israel ngă.

⁵ Kyua anăn Yêhôwa bi kjăp ƀuôn ala mtao hlăm kngan ñu; leh anăn jih jang phung Yuđa tuh jia kơ Y-Jôsaphat. Ñu mâo klei mdrŏng prŏng leh anăn klei arăng mpŭ.

⁶ Ai tiê ñu mâo klei jhŏng êbat hlăm êlan Yêhôwa; leh anăn êbeh kơ anăn ñu bi rai hĕ anôk dlông leh anăn phung rup yang Asêra mơ̆ng čar Yuđa.

⁷ Hlăm thŭn tal tlâo ênuk ñu kiă kriê, ñu tiŏ nao phung khua ñu Y-Ben-Hêl, Y-Ôbadia, Y-Sakari, Y-Nêthanel, leh anăn Y-Mikaya brei mtô hlăm ƀuôn prŏng čar Yuđa.

⁸ Mbĭt hŏng digơ̆ mâo phung Lêwi Y-Sêmaya, Y-Nêthania, Y-Sêbadia, Y-Asahel, Y-Sêmiramôt, Y-Jônathan, Y-Adônija, Y-Tôbija, leh anăn Y-Tôbadônija; leh anăn mbĭt hŏng phung Lêwi anei mâo phung khua ngă yang Y-Êlisama leh anăn Y-Jôram.

⁹ Diñu djă ba hdruôm hră klei bhiăn Yêhôwa leh anăn mtô hlăm čar Yuđa. Diñu hiu hlăm jih jang ƀuôn čar Yuđa leh anăn mtô kơ phung ƀuôn sang.

¹⁰ Klei huĭ kơ Yêhôwa truh kơ jih jang ƀuôh ala mtao hlăm čar jŭm dar čar Yuđa, leh anăn diñu amâo bi blah ôh hŏng Y-Jôsaphat.

¹¹ Đa đa phung Philistin djă ba mnơ̆ng myơr kơ Y-Jôsaphat leh anăn tuh jia hŏng prăk. Msĕ mơh phung Arabi ba kơ ñu kjuh êbâo kjuh êtuh drei biăp knô, leh anăn kjuh êbâo kjuh êtuh drei bê knô.

¹² Y-Jôsaphat đĭ jing prŏng hĭn nanao. Ñu mdơ̆ng hlăm čar Yuđa kđông kahan leh anăn ƀuôn hjiê.

¹³ Ñu mkăm pioh mnơ̆ng lu hlăm ƀuôn čar Yuđa. Ñu mâo phung kahan jhŏng ktang hlăm ƀuôn Yêrusalem.

¹⁴ Anei ênoh yap diñu tui si sang ama diñu: mơ̆ng čar Yuđa, phung khua kahan kơ sa êbâo čô: Y-Atna jing khua kahan mâo tlâo êtuh êbâo čô kahan jhŏng ktang,

¹⁵ leh anăn pô mrô dua jing khua kahan Y-Jôhanan mâo dua êtuh sa păn êbâo čô kahan,

¹⁶ leh anăn pô tal tlâo jing Y-Amasia anak êkei Y-Sikri, sa čô mŭt mă bruă kơ Yêhôwa hŏng klei čiăng, mâo dua êtuh êbâo čô kahan jhŏng ktang.

¹⁷ Mơ̆ng phung Benjamin: Y-Êliada sa čô kahan jhŏng ktang mâo dua êtuh êbâo čô kahan djă hna leh anăn khil,

¹⁸ leh anăn pô tal dua Y-Jôsabat mâo sa êtuh sa păn pluh êbâo čô kahan djă mnơ̆ng bi blah.

¹⁹ Phung anei mă bruă kơ mtao, êbeh kơ phung mtao dưm leh hlăm ƀuôn mâo kđông kahan tar ƀar čar Yuđa.