Otkrivenje 15 - I Biblija ki Arli romani čhib

O efta anđelja e eftane nevoljencar

¹ Tegani dikhljum pana jekh baro hem čudesno znako ko nebo: efta anđelja e eftane poslednjone nevoljencar, adalese so olencar završini pe e Devlesiri holi.

² I dikhljum nešto sar stakleno more mešime e jagaja hem okolen kola pobedinde i Zver, lakoro kip hem o broj lakere anavesoro. Terđovena ine uzalo stakleno more hem ićerena harfe save o Devel dinđa len.

³ Đilabde i đilib e Mojsijasiri, e Devlesere slugasiri, hem e Bakroresiri đilib: “Barei hem čudesna te delja, Gospode Devla, tu kova sa šaj! Pravednai hem čačikane te droma, Carona e nacijengere!

⁴ Ko te na daral tutar, Gospode, hem te na slavini to anav? Adalese so samo tu injan sveto. Sa o narodija ka aven i ka peren ko kočija angla tute, adalese soi mothovde te pravedna delja.”

⁵ Palo adava dikhljum sar ko nebo phravdilo o Hram – o Šatori oto svedočanstvo,

⁶ hem olestar iklile efta anđelja kolen ine o efta nevolje. On inele urjavde ano skupo hem čisto lan hem ko gruđa inele phandle zlatnone pojasencar.

⁷ Tegani jekh taro štar dživde bićija dinđa e eftane anđelenđe efta zlatna čare pherde e Devlesere holjaja, kova zauvek živini.

⁸ O Hram pherdilo čuroja e Devlesere slavatar hem lesere zoralipnastar, hem niko našti ine te đerdini ano Hram sa đikote na završini pe o efta nevolje e eftane anđelendar.