Matej 4 - I Biblija ki Arli romani čhib

E Isuse ki pustinja kušini o beng

¹ Tegani o Duho legarđa e Isuse ki pustinja te ovel iskušime e bengestar.

² Palo adava so postinđa saranda dive hem saranda raća, bokhalilo.

³ Tegani alo koro leste o beng kova kušini hem phenđa lese: “Te injan o Čhavo e Devlesoro, vaćer akale barenđe te oven maro.”

⁴ A o Isus phenđa: “Pisimei ano Sveto lil: ‘O manuš naka živini samo oto maro nego oto đijekh lafi savo ikljola taro muj e Devlesoro.’ ”

⁵ Tegani o beng legarđa le ki Sveto diz Jerusalim, čhivđa le upro naj učo than e Hramesoro

⁶ hem phenđa lese: “Te injan o Čhavo e Devlesoro, frde tut akatar tele! Adalese soi pisime: ‘Ka naredini ple anđelenđe te arakhen tut, te akharen tut ko vasta te na khuve tut preja ko bar.’”

⁷ A o Isus phenđa lese: “Pisimei hem akava: ‘Ma kušin e Gospode, te Devle.’ ”

⁸ Tegani o beng anđa le upri but uči gora, mothovđa lese sa o carstvija e phuvjakere hem lengiri slava

⁹ hem phenđa lese: “Sa akava ka dav tut, te peljan ko kočija angla mande te slavine man!”

¹⁰ A o Isus phenđa lese: “Dža mandar, Sotone! Adalese soi pisime: ‘Per ko kočija samo anglo Gospod, to Devel, hem samo ole kande!’ ”

¹¹ Tegani o beng cidinđa pe olestar, a o anđelja ale te kanden le.

O Isus lela te propovedini

¹² A kad o Isus šunđa so e Jovane e Krstitelje phandle, irinđa pe ki Galileja.

¹³ Ačhavđa i diz Nazaret hem dželo te živini ani diz Kafarnaum, uzalo e Galilejakoro jezero, ko krajo oto plemija e Zavulonesere hem e Neftalimesere.

¹⁴ Ađahar pherdilo okova so phenđa o proroko o Isaija:

¹⁵ “Ani phuv e Zavulonesiri hem e Neftalimesiri, uzalo jezero e Galilejakoro, tari aver strana oti len Jordan, ani regija Galileja e avere nacijengiri,

¹⁶ o manuša kola živinde ani tomina dikhle baro svetlost; o svetlost thabilo upro okolende kola živinde ani senka e meribnasiri.”

¹⁷ Otegani o Isus lelja te propovedini: “Pokajinen tumen zako tumare grehija, adalese soi paše o carstvo e nebosoro!”

O Isus vičini ple prvone učenikonen

¹⁸ Sar o Isus nakhela ine uzalo e Galilejakoro jezero, dikhlja e duje phraljen, e Simone vičime Petar hem e Andreja, sar frdena o mreže ano pani, adalese so inele manuša so dolena maćhen.

¹⁹ I phenđa lenđe: “Phiren pala mande hem me ka ćerav tumen te dolen manušen sar maćhen!”

²⁰ On odmah ačhavde pumare mreže hem džele palo leste.

²¹ Kad džele adathar hari po dur, o Isus dikhlja avere duje phraljen, e Jakove hem e Jovane, sar pumare dadeja e Zevedeja bešena ano čamco hem popravinena pumare mreže. O Isus vičinđa hem olen.

²² I on otojekhvar ačhavde o čamco hem pumare dade hem džele palo leste.

O Isus sasljari e nambormen

²³ O Isus džala ine maškari sa i Galilejaja hem sikaj e manušen ano lengere sinagoge, vaćerindoj o Šukar lafi oto carstvo e nebosoro hem sasljarindoj e manušen oto đijekh nambormipe hem bizoralipe.

²⁴ O glaso olestar šundilo ani sa i Sirija, i đi adathar o manuša anena ine koro leste sa e nambormen oto razna nambormipa hem muke, e manušen ano kolende inele demonja, e manušen kolen inele epilepsija hem e nepokretnonen, a o Isus sasljari len ine.

²⁵ Palo leste džele sa edobor manuša tari regija Galileja, taro Dekapolis, tari diz Jerusalim, tari regija Judeja hem tari aver strana oti len Jordan.