Jovano 2 - I Biblija ki Arli romani čhib

O Isus ćerela o pani ani mol

¹ Ko trito dive inele bijav ano gav Kana ani regija Galileja. Adari inele e Isusesiri daj,

² a ko bijav inele vičime hem o Isus hem lesere učenici.

³ Kad na ačhili više mol ko bijav, e Isusese phenđa lesiri daj: “Nane len više mol.”

⁴ O Isus phenđa laće: “So isi man adaleja, đuvlije? Mlo vreme pana na alo.”

⁵ Lesiri daj phenđa e slugenđe: “Ćeren sa so vaćeri tumenđe!”

⁶ Adari inele šov bare bokalija oto bar, a ko đijekh bokali resela ine taro oftovardeš đi ko šelu biš litarja. O Jevreja koristinena len ine zako pumaro adeti e thojbnasoro.

⁷ O Isus phenđa e slugenđe: “Pheren panjeja o bokalija”, hem on pherde len đi o muj.

⁸ Kad ćerde adava, phenđa lenđe: “Akana dolen hari hem legaren e manušese kovai odgovorno zaki gozba.” I on ćerde ađahar.

⁹ Adava manuš probinđa o pani savo ulo mol, i adalese so na džanđa kotari adaja mol – iako džande o sluge kola dolinde pani – vičinđa e mladoženja

¹⁰ hem phenđa lese: “Đijekh manuš prvo ikali i šuži mol, a kad o gostija mačona, ikali i mol savi nane edobor šuži. A tu garavđan i najšuži mol sa đi akana.”

¹¹ Ađahar o Isus plo prvo čudesno znako ćerđa ani Kana e Galilejakiri, hem mothovđa pli slava, i lesere učenici verujinde ano leste.

¹² Palo bijav o Isus, pe dajaja, ple phraljencar hem ple učenikonencar, huljilo ani diz Kafarnaum. Adari ačhile nekobor dive.

O Isus na mukela te biknel pe ano Hram

¹³ Avela ine paše e jevrejengoro prazniko Pasha, i o Isus dželo ko Jerusalim.

¹⁴ Ano boro e Hramesoro o Isus arakhlja manušen sar biknena guruven, bakren hem goluben. Arakhlja hem okolen so menjinena o pare sar bešena adari.

¹⁵ I ćerđa bič oto dorikha hem sarijen kola biknena, sa e bakrencar hem e guruvencar, ikalđa taro Hram. Rasfrdinđa o pare okolengere so menjinena len ine, hem preirinđa lengere astalja.

¹⁶ Okolenđe kola biknena goluben phenđa: “Legaren adava akatar! Ma ćeren pijaca mle Dadesere čherestar!”

¹⁷ Lesere učenici setinde pe soi pisime ano Sveto lil: “O mangipe zako to čher ka thabljol ana mande sar jag.”

¹⁸ Tegani e jevrejengere vođe pučle e Isuse: “Save čudesnone znakoja ka dokažine amenđe da isi tut pravo te ćere sa akava?”

¹⁹ O Isus phenđa lenđe: “Peraven akava Hram hem me palem ka vazdav le zako trin dive.”

²⁰ A on phende: “Sarandu šov berš valjanđa te ćerel pe akava Hram, a tu ka vazde le zako trin dive?”

²¹ Ali o Hram savestar o Isus vaćerđa inele lesoro telo.

²² Kad uštino taro mule, lesere učenici setinde pe so phenđa adava, i poverujinde ano Sveta lila hem ano lafija save o Isus vaćerđa.

²³ A sa đikote inele ano Jerusalim zako prazniko Pasha, but džene dikhle o čudesna znakija save ćerela ine hem poverujinde ano leste.

²⁴ Ali korkoro o Isus na verujinđa lenđe, adalese so džanđa sarijen.

²⁵ Niko na valjanđa te vaćeri lese savoi o manuš, adalese so ov korkoro džanđa soi ano manuš.